मोहोळ : आपल्या प्रेम प्रकरणाची माहिती घरच्यांना समजली तर विरोध होईल या भितीने एका प्रेमीयुगुलाने नैराश्यपोटी नरखेड येथील एका शेतकऱ्याच्या शेतातील लिंबाच्या झाडाला १७ सप्टेंबर पहाटे तीनच्या सुमारास मुलीने दोरी तर मुलाने तिच्या ओढणीच्या साह्याने दोघांनी एकाच वेळेस एकाच झाडावर गळफास घेऊन जीवनयात्रा संपवल्याची दुर्दैवी घटना नरखेड येथे उघडकीस आली.
याबाबत पोलिसांनी दिलेल्या माहितीनुसार, नरखेड येथील प्रशांत रविंद्र शिंदे (वय १९) व प्रतिक्षा समीर शिंदे (वय १४) या दोघांचे प्रेम प्रकरण होते. या प्रेमप्रकरणाची माहिती घरच्यांना मिळाली तर आपल्याला प्रखर विरोध होईल या भीतीने १७ सप्टेंबर रोजी रात्री हे दोघेही घरातून निघून गेले. आणि पहाटे तीनच्या सुमारास नरखेड येथील बाळासाहेब शंकर पाटील यांच्या शेतातील बांधावरील एका लिंबाच्या झाडाला दोन वेगवेगळ्या फांदीला मुलाने ओढणीच्या सहाय्याने तर मुलीने दोरीच्या सहाय्याने गळफास घेऊन आत्महत्या केल्याची घटना उघडकीस आली.
सदर घटनेची माहिती मिळताच पोलीस उपनिरीक्षक संतोष इंगळे व पोलीस सहाय्यक पोलीस निरीक्षक अशुतोष चव्हाण यांनी घटनास्थळाला भेट देऊन पंचनामा करून दोघांचे प्रेत शवविच्छेदनासाठी मोहोळ ग्रामीण रुग्णालय मध्ये आणले.