चाकूचा धाक दाखवून मायलेकीला लुटले

चाकूचा धाक

पंढरपूर : घराकडे जाण्यासाठी रस्त्यावर थांबलेल्या मायलेकी प्रवासी जीपमध्ये बसल्या. पण त्यातील चौघांनी तोंडात रूमालाचा बोळा घालून व चाकूचा धाक दाखवत त्यांच्याजवळील ६७ ग्रॅम सोने लुटले. ही घटना वाखरी, बाजीराव विहीर, खेडभाळवणी रस्त्यावर मंगळवारी दुपारी अडीचच्या सुमारास घडली.माहेरी आलेल्या सुवर्णा दत्तात्रय आसबे (वय ३0, कौठाळी) या त्यांच्या आई कुसूम दत्तू पोरे यांच्याबरोबर बाजीराव विहीर येथील घरी जाण्यासाठी रस्त्याच्या कडेला वाहनाच्या प्रतीक्षेत थांबल्या होत्या. दरम्यान पांढऱ्या रंगाची जीप आल्यानंतर त्या प्रवासी जीप समजून बसल्या. पण थोड्याच वेळात जीपमधील अज्ञात चौघांनी दोघांच्या तोंडात रूमाल घालून तोंड बंद तर केलेच त्याचबरोबर चाकूचा धाक दाखवत ६७ ग्रॅम सोन्याचे दागिने लुटले. याची किंमत १ लाख ६0 हजार २00 इतकी आहे. याबाबत पंढरपूर तालुका पोलीस ठाण्यात सुवर्णा आसबे यांनी फिर्याद दिली आहे. घटनेनंतर तत्काळ चोरट्यांच्या तपासासाठी वेगवेगळ्या भागात दोन पथके रवाना झाली आहेत. तपास सपोनि आर. आर. गोंदे करीत आहेत.