सोलापूर : महाविद्यालयात शिक्षण घेणाऱ्या मुलीला पालकाकडून घरी बसवून अभ्यास करावयास लावले असताना तिला लग्नाचे आमिष दाखवून पळवून नेण्याची धक्कादायक घटना शहरातील एका परिसरात सकाळी पावणेआठच्या सुमारास घडली. या प्रकरणी मुलीच्या आईने जेलरोड पोलीस ठाण्यात तक्रार नोंदवल्याने जुबेर अलीशान मकानदार (वय- २३) याच्याविरुद्ध विनयभंगासह बालकाचे लैंगिक अपराधापासून संरक्षण कलमान्वये गु्न्हा नोंदला आहे.
फिर्यादीत पिडितेच्या आईने म्हटले आहे की, यातील पिडिता शहरातील एका परिसरात कुटुंबासमवेत राहते. गुरुवारी सकाळी पावणेआठच्या सुमारास ती झाडू मारता मारता घरातून निघून गेली. शोधाशोध करुनही ती सापडली नाही. जाताना तिने आईचा मोबाईल घेऊन गेली होती. त्यावर फोन केला असता तिने महाविद्यालयात असल्याचे सांगून फोन बंद केला. वरील आरोपीसोबत मुलगी गेली असावी म्हणून त्याच्या मोबाईलवर फोन केला असता त्याचा मोबाईल बंद होता. आपल्या मुलीला लग्नाचे आमिष दाखवून प्रेमाचे नाटक करुन पळवून नेले असल्याची तक्रारीत म्हटले आहे. या प्रकरणी तपास महिला फौजदार तळे करीत आहेत.