सोलापूर : एमआयडीसीतील काम आटोपून दुचाकीने साथीदारासोबत घराकडे जात असताना दोघांनी त्याला अडवून खिशातील रोकड हिसकावून घेतली. प्रतिकार करताना बिअरची बाटली डोक्यात, तोंडावर फोडून जखमी केले. गडगीनगरातील बिअर शॉपीजवळ ही घटना घडली.
लक्ष्मण अंबादास चिक्कलगी (रा. किसाननगर, अक्कलकोट रोड, सोलापूर) असे जखमीचे नाव आहे. यातील जखमी लक्ष्मण चिक्कलगी आणि त्याचा साथीदार रितेश ठवरे हे होघे एमआयडीसीत एका कारखान्यात कामास आहे. काम आटोपून दोघे एकाच दुचाकीवरून घराकडे निघाले होते. सायंकाळच्या सुमारास त्यांची दुचाकी गडगी नगरातील लक्ष्मी मंदिराजवळ असलेल्या राज बिअर शाॅपी समोरील रोडवरून पास होत होती.
दरम्यान, दोघांनी जखमी लक्ष्मणची दुचाकी अडवली. एकानं त्याच्या खिशात हात घालून १२०० रुपये रोकड काढून घेतली. प्रतिकार करताना एकानं हातातली बिअरची बाटली डोक्यात मारून जखमी केले. यात त्याच्या चेहऱ्यालाही जखम झाली. त्याच्यावर उपचार करण्यासाठी भाऊ रतिराज याने येथील शासकीय रुग्णालयात दाखल केले. त्याच्यावर उपचार सुरू असून, तो शुद्धीवर असल्याचे डॉक्टरांनी सांगितले.