गेल्या अनेक वर्षांपासून वीज बिल थकीत आहे. शेतकऱ्यांनीसुद्धा बिल माफ होईल या आशेवर भरलेच नाही. त्याची रक्कम आता १ लाखाच्या घरात गेली आहे. शासनाने शेतकऱ्यांना सोयीचे व्हावे म्हणून दोन महिन्यांपूर्वी कृषी धोरण-२०२० या योजनेखाली पन्नास टक्क्यांपेक्षा अधिक बिलात सूट देण्याची योजना अमलात आणली. त्याकडे शेतकऱ्यांनी गांभीर्याने पाहिले नाही. त्यात राज्य सरकार कधी वीज तोडू नका, तर कधी सर्वांना वीज बिल भरावे लागणार आहे, अशा धरसोड वृत्तीमुळे शेतकरी व अधिकारी, कर्मचारी सर्वजण संभ्रमात होते.
अचानकपणे १३ मार्चपासून सरसकट डीपी बंद करण्यात येत आहेत. यामुळे शेतकऱ्यांच्या शेतातील केळी, ऊस, गहू, हरभरा, भाजीपाला अशी सर्व पिके वाळू लागली आहेत. यामुळे शेतकऱ्यांमधून एकच पळापळी सुरू झाली आहे. यंदाच्या वर्षी कोरोना, अतिवृष्टीमुळे शेती पिकाचे नियोजन कोलमडले आहे. अशा दुहेरी संकटात सापडलेला शेतकरी नाराज झाल्याच्या भावना नंदकुमार चव्हाण, चुंगी, प्रशांत म्हेत्रे, सलगर, गंगाधर बिराजदार, रामपूर, आंदप्पा कळके, अक्कलकोट यांनी व्यक्त केल्या.
----
४६० रोहित्राचा वीजपुरवठा खंडित
तडवळ, गुद्देवाडी, अंकलगे, कोर्सेगाव, दुधनी, मैंदर्गी, चप्पळगाव, चुंगी, मोटयाळ, कुरनूर, किणी, वागदरी, घोसळगाव, नागणसूर, तोळणूर, जेऊर, शिरवळ आदी भागातील तब्बल ४६० रोहित्राचा वीज पुरवठा खंडित केला आहे.
कनेक्शन ५ एचपीचे; बिल ७ एचपीचे
वीज खंडित केलेल्या रोहित्रावर जवळपास ५ हजार ५२० शेतकऱ्यांचे विद्युत पंप आहेत. ‘माझे ५ एचपीचे कनेक्शन असताना मला साडेसात एचपीचे बिल आल्याचे नंदकुमार चव्हाण यांनी सांगितले, तसेच माझे वीज बिल पूर्णपणे भरलेले असताना थकीत शेतकऱ्यांबरोबर माझा वीज पुरवठा बंद केल्याची तक्रार त्यांनी महावितरण कार्यालयात केली.
----
शासनाच्या आदेशानुसार शेतीपंपाच्या थकीत वीज बिल वसुली मोहीम तीव्र केली आहे. ४६० डीपी बंद करण्यात आल्या. १ ते १५ मार्च या कालावधीत ७६१ शेतकऱ्यांनी १ कोटी ३६ लाख रुपयांचा वीज बिल भरणा केला आहे. जे बिल भरणा करीत आहेत त्यांना तात्काळ जोडणी करून देण्यात येत आहे. शेतकऱ्यांमधून प्रचंड प्रतिसाद मिळत आहे. गेल्या तीन दिवसांपासून डीपी बंद केल्या जात होत्या. यापुढे वैयक्तिक शेतकऱ्यांचे कनेक्शन तोडण्यात येणार आहे. यापूर्वी संबंधित शेतकऱ्यांना मोबाइलद्वारे नोटीस देण्यात आली आहे.
- संजीवकुमार म्हेत्रे, उपमुख्य कार्यकारी अधिकारी.
----
अक्कलकोट येथील महावितरणच्या कार्यालयासमोर बिल भरण्यासाठी शेतकऱ्यांनी केलेली गर्दी.