दक्षिण सोलापूर तालुका संचालक पदाच्या निवडणुकीत पक्षाची भूमिका ठरवण्यासाठी आमदार सुभाष देशमुख यांनी निवडक कार्यकर्त्यांची बैठक बोलावली होती. या बैठकीला आमदार सचिन कल्याणशेट्टी, भाजपचे तालुकाध्यक्ष रामप्पा चिवडशेट्टी, हणमंत कुलकर्णी, डॉ.चनगोंडा हविनाळे, आप्पासाहेब पाटील, एम. डी. कमळे, जि. प. पक्षनेते अण्णाराव बाराचारे, सचिन पाटील, शशिकांत दुपारगुडे, शिरीष पाटील आदी उपस्थित होते.
मागील निवडणुकीत आप्पासाहेब पाटील-वडकबाळकर आणि सुरेश हसापुरे यांच्यात लढत झाली होती. यावेळी पुन्हा हसापुरे हेच उमेदवार असे गृहीत धरून बैठकीत भाजपच्या संभाव्य उमेदवारांची चाचपणी करण्यात आली.
------
उमेदवार नंतर ठरवू
संचालक मंडळाची निवडणूक लढण्यावर बैठकीत एकमत झाले. मात्र उमेदवार कोण यावर नंतर चर्चा करू, तोपर्यंत भाजपाच्या कार्यकर्त्यांनी विकास सोसायट्यांच्या संचालक मंडळाशी संपर्क साधावा आणि पक्षाच्या कार्यकर्त्यांच्या नावे सोसायट्यांचे ठराव घ्यावेत, असा निर्णय बैठकीत घेण्यात आला.
------
शिवदारे यांची बैठकीला दांडी
बँकेचे माजी संचालक राजशेखर शिवदारे यांनाही आमदार सुभाष देशमुख यांच्या कार्यालयातून बैठकीला उपस्थित राहण्याचा निरोप पाठवण्यात आला होता. परंतु शिवदारे यांनी बैठकीला येण्याचे टाळले. आता त्यांच्याशी थेट संपर्क साधून आमदार सुभाष देशमुख स्वतः चर्चा करणार असल्याचे सांगण्यात आले.