विलास जळकोटकर, सोलापूर : प्रदीर्घ काळानंतर पाऊस पडला, रस्त्यावरचे खड्डेही पाण्यानं भरले. यामुळे रस्त्याचा अंदाज न आल्यानं दुचाकी खडड्यात पडून दुचाकीस्वाराचं डोकं शेकाटलं, डोळा अगडबंब सुजला. सोमवारी दुपारी चारच्या सुमारास खुदावाडी (ता. तुळजापूर) येथे ही घटना घडली. लिंगराज प्रभाकर घोडके असे जखमीचे नाव आहे.
यातील जखमी हा अणदूर गावाहून खुदावाडी या आपल्या गावी निघाला होता. घरापासून २०० मीटर अंतरावर पावसामुळे खड्ड्यात पाणी साचल्यामुळे अंदाज आला नाही. दुचाकीस्वार दुचाकीसह खड्ड्यात पडला. त्याच्या डोक्याला, डोळ्यास दुखापत झाली. नातलगांनी त्याला नळदुर्ग येथील सरकारी दवाखान्यात नेले तेथे प्राथमिक उपचार करून सोलापूरच्या शासकीय रुग्णालयात दाखल केले. त्याची प्रकृती स्थिर आहे. सिव्हिल पोलिस चौकीत या घटनेची नोंद झाली आहे.