माळशिरस : साताराहून सोलापूरकडे निघालेल्या एसटी बसवर दरोडेखोरांनी दगडफेक करून ती लुटण्याचा प्रयत्न केला. मात्र, चालकाने प्रसंगावधान राखत बस जोरात खाली आणली. या हल्ल्यात चालक जखमी झाला आहे. तसेच पाठीमागून येणाऱ्या दुचाकीस्वाराला अडवून त्याच्यावर दगडाने हल्ला केल्याचा प्रकार मंगळवारी रात्री घडली.
पोलीस सूत्राकडील माहितीनुसार सातारा स्थानकातून सोलापूरच्या दिशेने निघालेली एस.टी. बस (एम. एच. १३ एस. ८९७१) म्हसवडजवळ आली. येथे चालक आणि वाहकाने जेवण आटोपून बस पुढे आणली. घाटातून बस शेवटच्या वळणावर आली. अचानक झाडामागे लपलेले चार-पाच तरुण पुढे येत चालकाच्या दिशेने दगडफेक करून बसवर ताबा मिळविण्याचा प्रयत्न केला. मात्र, प्रसंगावधान राखत चालकाने बस न थांबवता पुढे जोरात दामटली. घाटाखाली उतरताच वर निघालेल्या लोकांना थांबवून याची माहिती दिली. तसेच तत्काळ माळशिरस पोलिसांशी संपर्क साधून याची माहिती दिली. माहिती मिळताच पोलिसांनी घाटाकडे घेतली. रस्ता रात्रीत पूर्ववत केला आहे. याची गंभीर दखल घेत पोलिसांनी कोम्बिंग ऑपरेशन सुरू केले. घटनेचे वृत्त कळताच पोलीस निरीक्षक दीपरतन गायकवाड, सहायक पोलीस निरीक्षक शशिकांत शेळके यांच्यासह पथक घटनास्थळी दाखल झाले.
दुचाकीस्वाराला मारहाण
या बसच्या मागून येणाऱ्या दुचाकीस्वारालाही या चोरट्यांनी थांबवून मारहाण केल्याची माहिती पाेलीस सूत्रांनी सांगितली. या हल्ल्यात तोही जखमी झाल्याचे वृत्त असून, त्यांची नावे समजू शकली नाहीत.