सोलापूर : वळसंग-कुंभारी दरम्यान झालेल्या कंटेनर अपघाताला ६० तास उलटल्यानंतर परिस्थिती नियंत्रणात आणण्यात पोलिसांना यश आले आहे. जागोजागी थांबलेल्या संतप्त जमावाला नियंत्रणात आणले आहे. तसेच जमावाने चोपल्याने जखमी झालेला कंटेनर चालक पी. के. पांडे याला शासकीय रुग्णालयात उपचारासाठी दाखल केले आहे.
शुक्रवारी रात्री दहा वाजण्याच्या सुमारास अक्कलकोटहून आलेल्या कंटनेरने वळसंग येथे एका वडापावच्या गाडीला धडक दिली. संतप्त जमावाने पाठलाग सुरू केल्यानंतर बिथरलेल्या कंटेनरचालकाने सुसाट वेगात कुंभारीच्या दिशेने निघाला. तो दोड्डी गावच्या रस्त्याला वळणार होता. मात्र, त्याने थेट कुंभारीत वेशीमध्येच गाडी घातली. कुंभारी ते वळसंग दरम्यान सहा वाहनांना चिरडत दोघांचा बळी घेतला. एकजण कुंभारीत वाहनाखाली आला. त्याचाही मृत्यू झाला. ही थरारक घटना रात्री दहा वाजल्यानंतर घडली. या अपघातात सकलेन कुरेशी आणि राेहित चौगुले या दोघांचा मृत्यू झाला.
शुक्रवारी दिवसभर ग्रामपंचायती निवडणुकीमुळे वळसंग पोलीस ठाण्याचे कर्मचारी गुरुवारपासून कामात व्यस्त होते. रात्री हा अपघात होताच पोलीस शिपाई अब्दुल रजाक मुल्ला यांना याची माहिती सर्वप्रथम मिळाली. यावेळी पोलीस ठाण्यात असलेले पेालीस कर्मचारी दीपक गाढवे, लक्ष्मण काळजे यांना याची माहिती कळवली. मतपेट्या जमा करण्याचे काम सुरू असताना या पोलिसांपुढे अपघाचे संकट वाढवून ठेवले. मुल्ला यांनी वरिष्ठ अधिका-यांना आणि आपल्या सहकाऱ्यांना अपघातस्थळी धावून येण्याचे आवाहन केले. रात्री १० वाजेपर्यंत पोलिसांची कुमक जमली. कुंभारीजवळ वेशीत कंटेनर अडकल्यानंतर चालक संतप्त जमावाच्या ताब्यात आला. त्याला पोलिसांनी सुरक्षितपणे बाहेर काढले. जमावाला सोलापूरला जाण्यापासून रोखले.
---
आरटीओ अधिकाऱ्याकडून तपासली वाहने
या घटनेनंतर अपर पोलीस अधीक्षक अतुल मोहिते, उपविभागीय अधिकारी डॉ. संतोष गायकवाड, तहसीदार अमोल कुंभार, प्रांताधिकारी यांनी घटनास्थळी धाव घेतली. जिथे जिथे अपघात झाला तिथे-तिथे संतप्त जमाव वाढत गेला. त्यांच्यावर नियंत्रण आणणे जिकिरीचे होते. पहाटेपर्यंत वाहतूक विस्कळीतच झालेली होती. यावेळी क्रेनला पाचारण केले. या क्रेनच्या मदतीने अपघातातील वाहने ही पोलीस ठाण्याच्या आवारात आणून लावली गेली. एक कंटेनर, तीन दुचाकी, दोन कार ही वाहने क्रेनच्या माध्यमातून हलवली गेली. आरटीओ अधिकाऱ्यांकडून ही वाहने तपासण्यात आली. ही परिस्थिती नियंत्रणात आणण्यात पोलिसांना ६० तास परिश्रम घ्यावे लागले. परिस्थिती नियंत्रणावर आणण्यात पोलीस उपनिरीक्षक स्वामीराव पाटील आणि अजय हंचाटे आणि त्यांच्या सहकाऱ्यांनी योगदान दिले.
---
घाबरलेला चालक म्हणतोय..मुझे बचाव
अपघातानंतर कंटनेर चालक पी. के. पांडे हा जमावाकडून चोपला गेल्याने जखमी झाला. त्याची प्रकृती गंभीर नसल्याचे वैद्यकीय सूत्रांनी सांगितले. मात्र, अजूनही घाबरलेल्या अवस्थेत असून शासकीय रुग्णालयात त्याच्यावर उपचार सुरू आहेत. झोपेत तो पोलिसांना मुझे बचाव...मैने गलत काम किया है, मैने जानबुझकर नही किया साब, मुझे बचाव असा बडबडतोय. उपचारानंतर त्याला न्यायालयात हजर केले जाणार असल्याचे सहायक पोलीस निरीक्षक अतुल भोसले यांनी सांगितले.