पंढरपूर-मंगळवेढा विधानसभा मतदारसंघाच्या पोटनिवडणुकीसाठी भारत निवडणूक आयोगाकडून लवकरच निवडणुकीचा कार्यक्रम जाहीर होण्याची शक्यता आहे. यामुळे पंढरपूर प्रांत कार्यालयात बैठकीचे आयोजन केले होते. या बैठकीस उपविभागीय पोलीस अधिकारी विक्रम कदम, तहसीलदार सुशील बेल्हेकर, स्वप्नील मरोड, तालुका आरोग्य अधिकारी डॉ. एकनाथ बोधले, निवडणूक नायब तहसीलदार सुरेश तिटकारे यांच्यासह विविध राजकीय पक्षांचे पदाधिकारी उपस्थित होते.
पंढरपूर-मंगळवेढा विधानसभा मतदारसंघ पोटनिवडणुकीसाठी कोरोना आजाराच्या पार्श्वभूमीवर मतदान केंद्रावर आवश्यक ती काळजी घेतली जाणार आहे. मतदान केंद्राच्या नावात बदल, पूर्वीच्या मतदान केंद्राची इमारत मोडकळीस आल्याने मूळ मतदान केंद्राच्या ठिकाणी नवीन इमारत प्रस्तावित करण्यात आल्या आहेत. त्याचबरोबर साहाय्यकारी मतदान केंद्राच्या ठिकाणी झालेला बदल, नावात झालेला बदल याबाबतची सर्व माहिती राजकीय पक्षांच्या प्रतिनिधींना देण्यात येणार आहे. यामध्ये काही बदल सुचवायचे असतील तर तात्काळ बदल सुचवावेत, असेही प्रांताधिकारी गजानन गुरव यांनी सांगितले.
पोटनिवडणुकीसाठी ४२ मतदान केंद्रांच्या नावांमध्ये बदल झालेला असून, पंढरपूर शहर २२, ग्रामीण २, तसेच मंगळवेढा येथील २८ केंद्रांच्या नावात बदल झाला आहे. मतदार यादीत छायाचित्र नसलेल्या मतदारांचे फोटो संकलित करण्याबाबत संबंधितांनी बीएलओ नेमून बीएलओंना सहकार्य करावे. ज्यांचे वय १ जानेवारी २०२१ रोजी १८ वर्षे पूर्ण झाले आहे, त्यांनी मतदार नोंदणी करावी, निवडणूक कार्यक्रम जाहीर झाल्यास कोणालाही मतदार नोंदणी करता येणार नाही, असेही गुरव यांनी सांगितले.
पोटनिवडणूक नि:पक्ष, निर्भीड वातावरणात पार पाडण्यासाठी पोलीस प्रशासनाच्या वतीने योग्य ती तयारी केली आहे. या निवडणुकीत मतदान केंद्राची संख्या वाढल्याने आवश्यक पोलीस बंदोबस्त उपलब्ध केला जाणार असल्याचे उपविभागीय पोलीस अधिकारी विक्रम कदम यांनी यावेळी सांगितले.