आॅनलाइन लोकमत सोलापूर
सोलापूर : आप्पासाहेब पाटील
गंभीर स्थितीतील रुग्णाला घटनास्थळपासून तत्काळ रुग्णालयात पोहोचविण्यासाठी केंद्र शासनाने १०८ रुग्णवाहिका सेवा सुरू केली आहे. या रुग्णवाहिकेने मागील चार वर्षात १५ लाख ९२ हजार २०५ जणांचे प्राण वाचविले आहेत़ राज्यात ९३७ रुग्णवाहिकेद्वारे अपघात व इतर रुग्णांना सेवा देण्याचे कार्य अविरत सुरूच आहे. त्यामुळे ग्रामीण भागात या सेवेला देवदूत संबोधले जात आहे़ वाढलेल्या वाहनांमुळे अपघाताचे प्रमाण दिवसेंदिवस वाढत चालले आहे. अपघात झाल्यापासून एक तासाच्या अगोदर संबंधित रुग्णाला उपचार मिळाल्यास सदर रुग्ण बचावण्याची शक्यता राहते. विशेषत: ग्रामीण भागात रुग्णाला वेळेवर रुग्णालयात पोहोचविण्यासाठी चारचाकी वाहन उपलब्ध होणे कठीण असते. त्याचबरोबर गर्भवती महिलेला प्रसूतीसाठी वेळेवर रुग्णालयात दाखल करणे अत्यंत गरजेचे आहे. या अडचणीच्या परिस्थितीत रुग्णाला रुग्णसेवा उपलब्ध व्हावी, या उद्देशाने राज्य शासनाने २६ जानेवारी २०१४ रोजी १०८ ही मोफत रुग्णवाहिका सुरू केली़ २०१४ साली ५६ रुग्णवाहिकेद्वारे १७८ अत्यावश्यक रुग्णांसह ३० हजार ७०५ रुग्णांना, २०१५ साली ७२ रुग्णवाहिकेच्या माध्यमातून २६१ अत्यावश्यक रुग्ण व २५ हजार ५३१ रुग्णांना तर २०१६ मध्ये ७१ रुग्णवाहिकेद्वारे ४९ हजार ३२१ रुग्णांना सेवा दिली़
-----------------------
आषाढी यात्रेत वारकऱ्यांच्या सेवा करणार
पंढरपूरच्या आषाढी यात्रेत १०८ या रूग्णवाहिकेव्दारे ७५ मेडीकल व १० ट्रामा गाड्यांचा ताफा ठेवण्यात आला आहे़ पालखी मार्गावरील सर्व रूग्णालयांना रूग्णवाहिका पुरविण्यात आल्या आहेत़ वारकऱ्यांना छातीत दुखणे, आॅपरेशनस, दंश, दुखापत आदी बाबींसाठी औषधोपचारही सज्ज ठेवण्यात आली आहेत़ ही सेवा २४ तास सज्ज ठेवण्यात आली आहे़ यासाठी पुण्याहुन ५४, साताराहुन ६ तर सोलापूरहुन १६ रूग्णवाहिका पालखी मार्गावर असणार आहेत़
---------------
जिल्हानिहाय रूग्णसंख्येवर एक नजर अहमदनगर ६७१३७, अकोला २७८३०, अमरावती ४९००४, औरंगाबाद ६६९१७, बीड ३८८९६, भंडारा २१०३२, बुलढाणा २१०३२, चंद्रपूर ४४७३१, धुळे ३०११८, गडचिरोली १५९२५, गोंदिया २२६८६, हिंगोली ३२२६७, जळगांव ४९२३०, जालना ३०१८१, कोल्हापूर ६०९२५, लातूर ४१५८०, मुंबई ९४१८१, नागपूर ६२८५६, नांदेड ४९९६६, नंदूरबार २२२६७, नाशिक ८१९०६, उस्मानाबाद ३०५३३, पालघर ३१९५६, परभणी २७१५९, पुणे १४०४५६, रायगड २२९५०, रत्नागिरी २३६५०, सांगली ४३४४५, सातारा ६८०९५, सिंधुदुर्ग १४३५१, सोलापूर १०४४९८, ठाणे ५६६५४, वर्धा १९२०२, वाशिम २३७८९, यवतमाळ ४६३८८़