लग्न हा प्रत्येकाच्या आयुष्यातील एक अतिशय मोठा आणि महत्त्वाचा निर्णय असतो. तुम्ही निवडत असलेला पार्टनर संपूर्ण आयुष्य त्याच्यासोबत काढण्यासाठी योग्य आहे की नाही याचीही खात्री करून घ्यावी लागते. तुम्हाला जर कोणी झाडाच्या प्रेमात पडून त्याच्याशी लग्न केल्याचं सांगितलं. तर सुरुवातीला तुमचा विश्वासच बसणार नाही. पण हो हे खरं आहे. एका ब्रिटिश महिलेनं स्वतःसाठी अतिशय वेगळा पार्टनर निवडला आहे. तिने चक्क एका झाडासोबत लग्नगाठ बांधली आहे. या झाडातच आपला आयुष्यभराचा जोडीदार दिसला असं या महिलेचं म्हणणं आहे.
केट कनिंघम (Kate Cunningham) असं या महिलेचं नाव असून तिने 3 वर्षांपूर्वी झाडासोबत लग्न केलं आहे. आता झाडासोबतच्या आपल्या वैवाहिक आयुष्यात आपण भरपूर आनंदी असल्याचं या महिलेनं सांगितलं. माझं माझ्या पतीवर खूप प्रेम आहे आणि सध्या आमचं आयुष्य अतिशय परफेक्ट आहे असं देखील तिने म्हटलं आहे. अनेक लोक तिला लग्नाबाबत प्रश्न विचारतात, मात्र या सर्वांना तिला हे सांगायचं आहे की तिचं आयुष्य खूप चांगलं आणि मस्त चाललं आहे.
ग्रह-दोष मिटवण्यासाठी झाडासोबत लग्न केल्याच्या अनेक घटना ऐकल्या असतील. मात्र या महिलेबाबत असं नाही. तिला या झाडातच आपला जोडीदार दिसला आणि साल 2019 मध्ये तिने अतिशय उत्साहात झाडासोबत लग्न केलं. आठवड्यात पाचवेळा ती आपल्या पतीला भेटायला जाते. आता ख्रिसमसमुळे तिने आपल्या पार्टनरला भरपूर सजवलं आहे. 37 वर्षाच्या केट हिने रिमॉर्स वॅली काउंटी पार्कमध्ये या झाडासोबत लग्न केलं होतं. यानंतर तिने आपलं आडनाव बदलून मिसेस एल्डर असं केलं होतं.
जेव्हा ती एखाद्याला विशिंग कार्ड पाठवते तेव्हा त्यावर मिस्टर अॅण्ड मिसेस एल्डर असं लिहिलेलं असतं. आपण तिसऱ्यांदा ख्रिसमस सोबत करत असल्याचं केटने सांगितलं. केटचं असं म्हणणं आहे की विशेषतः ख्रिसमसच्या वेळी तिचा वृक्ष पती अधिक आकर्षक दिसतो. पार्कमध्ये सतत येणं सुरू असतानाच या झाडावर आपल्याला प्रेम झाल्याचं त्यांनी सांगितलं. याच प्रेमाला त्यांनी लग्नाच्या नात्यात बदललं आणि आता अगदी आनंदात आपलं वैवाहित आयुष्य जगत आहे. एका हिंदी वेबसाईटने याबाबतचे वृत्त दिले आहे.