अमेरिकेतील न्यू जर्सीमध्ये तीन महिला एका स्टोरमध्ये बेबी स्ट्रॉलर चोरी करताना कॅमेरात कैद झाल्या आहेत. हा व्हिडीओ आता सोशल मीडियात व्हायरल झाला आहे. स्टोरमध्ये आलेल्या महिला चोरी करण्यात यशस्वी झाल्या खऱ्या, पण यातील एका महिलेने एक चूक केली. ती तिच्या बाळाला स्टोरमध्येच सोडून आली. ती बाळाला आणायला पुन्हा स्टोरमध्ये गेली आणि तिला पुन्हा स्टोरमध्ये जाणं महागात पडलं. कारण तोपर्यंत त्यांच्या चोरीचा भांडाफोड झाला होता. स्टोर कर्मचाऱ्यांनी वेळीच पोलिसांना माहिती दिली होती.
पोलिसांनी प्रसारमाध्यमांना सांगितले की, या महिला स्ट्रॉलर चोरी करण्यासाठी मोठा प्लॅन करून आल्या होत्या. दोन महिलांनी एका कर्मचाऱ्याला फसवलं, एकीने स्ट्रॉलर उचललं आणि तेथून पसार झाली. पण ही चोरी एका कॅमेरात कैद झाली. नंतर हा व्हिडीओ स्टोरच्या फेसबुक पेजवर शेअर करण्यात आला.
व्हिडीओमध्ये एक महिला केशरी रंगाच्या टॉपमध्ये आणि डेनिम शॉर्ट्समध्ये एक स्ट्रॉवर चोरी करताना दिसत आहे. ती गपचुप स्टोरच्या बाहेर गेली. पण जेव्हा ती स्टोरमध्ये विसरलेल्या बाळाला घेण्यासाठी पुन्हा स्टोरमध्ये आली तेव्हा एका कर्मचाऱ्याने त्यांचा भांडाफोड केला होता. यातील दोन महिलांना अटक करण्यात आली आहे.