तुम्ही अनेकदा सोशल मीडियात महिलांसोबत गैरवर्तणूक केल्या गेल्याच्या घटना वाचल्या असतील. सोशल मीडिया प्लॅटफॉर्मच्या माध्यमातून अशा घटना नेहमी समोर येत असतात. असंच एक प्रकरण सध्या सोशल मीडियात व्हायरल झालं आहे. स्कॉटलॅंडच्या ग्लासगोमध्ये राहणाऱ्या लॅशने तिच्या ट्विटरवरून तिचा अनुभव शेअर केला आहे. ज्यात तिने सांगितले की, एका व्यक्तीने अश्लील चॅटिंग तर केलीच सोबतच नग्न फोटोंचीही मागणी केली. मात्र, तिने या व्यक्तीसोबत असं काही केलं की, तिचं सोशल मीडियातून कौतुक केलं जात आहे.
लॅश नावाच्या तरूणीने ट्विटरवर काही स्क्रीनशॉट्स शेअर केले आहेत. ज्यात तिने त्या व्यक्तीसोबत काय संभाषण झालं ते सांगितलं आहे. ही व्यक्ती बऱ्याच दिवसांपासून लॅशसोबत बोलण्याचा प्रयत्न करीत होती. आणि जेव्हा लॅश त्याच्याशी बोलली तेव्हा त्याचा उद्देश कळण्यात तिला फार वेळ लागला नाही.
लॅशने बातचीत सुरूच ठेवली. बोलता बोलता समोरच्या व्यक्तीने अशी मागणी केली की, लॅश ती वाचून हैराण झाली. त्याने तिला तिचे काही नग्न फोटो पाठवण्यास सांगितले. या फोटोंऐवजी ती व्यक्ती लॅशला पैसे सुद्धा देण्यास तयार होती. लॅशने लगेच त्याला होकार दिला.निक नावाच्या व्यक्तीने लॅशसमोर मागणी ठेवली की, जर तिचे नग्न फोटो मिळाले तर तो तिला ३० पाउंड(जवळपास २३०० रूपये) देईल.
लॅशने त्याची मागणी मान्य केली आणि पैसे पाठवण्यासाठी तिने तिचे पेपल अकाऊंट दिलं. निकने लगेच तिला ३० पाऊंड पाठवले.त्यानंतर लॅशने त्याच्यासोबत जे केलं ते मजेदार ठरलं. लॅशने त्याला एक असा फोटो पाठवला, जो पाहून निकने कपाळावर हात मारून घेतला असावा. निककडून पैसे मिळताच लॅशने हॉटेलमधून जेवणाची ऑर्डर दिली. आणि याचा एक फोटो काढून निकला पाठवला.
ट्विटरवर लोक लॅशने निकला शिकवलेल्या धड्याचं कौतुक करत आहेत. एका यूजरने लिहिले की, 'अशा लोकांना अद्दल घडवण्याचा हा सर्वात चांगला पर्याय आहे'. तर दुसऱ्या एका व्यक्तीने लिहिले की, 'निक आता पुढे कधीच अशाप्रकारचं चॅटिंग करण्याआधी शंभर वेळा विचार करेल'.