प्रवाशांची गर्दी, चेक-इनची धांदल, सुरक्षा तपासणी आणि गेटकडे पळण्याची घाई… विमानतळावरील ही धावपळ नेहमीचीच असते. अशा गोंधळात, काहीतरी खाण्यासाठी वेळ काढणे म्हणजे एक आव्हानच असते. पण, हैदराबादच्या राजीव गांधी आंतरराष्ट्रीय विमानतळाने यावर एक अनोखा उपाय शोधला आहे. त्यांनी भारतातील पहिल्या 'फूड डिलिव्हरी रोबोट'ची सुरुवात केली आहे. आजवर आपण परदेशातील असे रोबोट नक्की पाहिले असतील, पण आता भारतातील या रोबोटचा व्हिडीओ व्हायरल होत आहे.
कसा काम करतो हा रोबोट?
हैदराबाद विमानतळावरील हा एआयवर चालणार रोबोट आता प्रवाशांना थेट त्यांच्या गेटवर जेवण आणि ड्रिंक्स पोहोचवत आहे. सध्या हा रोबोट आंतरराष्ट्रीय टर्मिनलवरील गेट क्रमांक ३३, ३४ आणि ३५ तसेच, देशांतर्गत टर्मिनलवरील गेट क्रमांक ११० आणि १११ येथे सेवा देत आहे.
ऑर्डर कशी द्यायची?
विमानतळावरची ही रोबोट सुविधा वापरण्यासाठी प्रवाशांना चेक-इननंतर किंवा थेट रोबोटवर दिलेल्या क्युआर कोडला स्कॅन करायचे आहे. स्कॅन केल्यानंतर, मोबाईलवर मेनू दिसेल, ज्यात 'पिस्ता हाऊस', 'युनायटेड किचन्स ऑफ इंडिया' आणि 'मिनर्वा कॉफी शॉप' यांसारख्या रेस्टॉरंट्सचे पर्याय उपलब्ध आहेत. ऑर्डर निवडल्यानंतर आणि पैसे भरल्यानंतर, ग्राहकाच्या मोबाईलवर एक ओटीपी येतो.
यानंतर रोबोट रेस्टॉरंटमधून जेवण घेतो, आपल्या कंपार्टमेंटमध्ये ठेवतो आणि थेट ग्राहकाच्या गेटवर पोहोचतो. रोबोटच्या स्क्रीनवर ओटीपी टाकून ग्राहक आपले जेवण घेऊ शकतात.
या रोबोटची खास वैशिष्ट्ये काय आहेत?हा रोबोट केवळ सुविधाच देत नाही, तर तो मनोरंजकही आहे. ग्राहक आपल्या फोनवर रोबोटचा मार्ग पाहू शकतात. याची बॅटरी १२ तास चालते आणि एआय आधारित नेव्हिगेशनमुळे तो सहजपणे मार्ग शोधतो. जर रोबोटच्या मार्गात काही अडथळा आला तर तो, "कृपया मला वाट द्या, मला एक डिलिव्हरी करायची आहे," असे म्हणतो.
हा रोबोट ड्रिंक्स साधारणपणे ८ मिनिटांत आणि जेवण १५ मिनिटांत पोहोचवतो. यामुळे, रांगेत उभे राहण्याचा वेळ वाचतो आणि प्रवाशांना त्यांच्या फ्लाइटच्या वेळेची काळजी करण्याची गरज नाही.
प्रवाशी काय म्हणाले?प्रवाशांनी या अनोख्या रोबोटचे जोरदार स्वागत केले आहे. अनेक लोक त्याच्यासोबत फोटो काढत आहेत आणि सोशल मीडियावर आपले अनुभव शेअर करत आहेत. यामुळे विमानतळावरील खाण्यापिण्याचा अनुभव अधिक सोयीचा आणि आनंददायी झाला आहे. हैदराबाद विमानतळाचा हा प्रयोग भारताच्या विमान वाहतूक क्षेत्रात एक नवा अध्याय सुरू करत आहे. सध्या काही गेट्सवर ही सेवा उपलब्ध असली तरी भविष्यात तिचा विस्तार होण्याची शक्यता आहे.