मुझफ्फरपूर: एका मुलीवरून मुलांमध्ये हाणामारी झाल्याचे प्रकार तुम्ही अनेकदा पाहिले असतील. मात्र बिहारमधल्या मुझफ्फरपूरमध्ये एका तरुणावरून तीन तरुणींमध्ये राडा झाला आहे. मोतीझीलजवळ असलेल्या एका मॉलमध्ये हा प्रकार घडला. प्रियकरावर केलेल्या टिप्पणीमुळे तीन मुली भिडल्या. बघता बघता वादाचं पर्यावसान हाणामारीत झालं. यावेळी उपस्थित असलेल्या एकानं व्हिडीओ चित्रीत केला. तो आता व्हायरल झाला आहे.
व्हायरल व्हिडीओमध्ये तीन तरुणींमध्ये हाणामारी सुरू असल्याचं दिसत आहे. त्यातल्या दोघी एकीला मारत आहेत. एकमेकींचे केस धरून कानशिलात लगावल्या जात आहेत. हा व्हिडीओ दीड मिनिटांचा आहे. व्हिडीओमध्ये एकूण पाच जण दिसत आहेत. त्यात एक तरुण आणि चार तरुणी आहेत. चारपैकी तीन तरुणींमध्ये हाणामारी सुरू आहे. थोड्याच वेळात प्रकरण शांत झाल्यानं ते पोलीस ठाण्यापर्यंत गेलं नाही. मात्र तरुणींमध्ये सुरू असलेला राडा पाहण्यासाठी मॉलमध्ये मोठी गर्दी जमली होती.
या घटनेचा व्हिडीओ सोशल मीडियावर व्हायरल झाला आहे. या प्रकरणी कोणतीही तक्रार प्राप्त झाली नसल्याची माहिती नगर पोलीस ठाण्यातील अधिकाऱ्यांनी दिली. प्रियकरावरून हा वाद झाला. एका व्यक्तीनं मध्यस्थी केल्यावरून तरुणींमध्ये सुरू असलेला वाद शमला.