Viral Video : रस्त्यावर कार पार्किंग करतानाचे वेगवेगळे व्हिडीओ नेहमीच सोशल मीडियावर व्हायरल होत असतात. पण सध्या एक असा व्हिडीओ समोर आला आहे जो बघून सगळेच हैराण झाले. हा व्हिडीओ चीनमधील आहे. येथील एका सिक्युरिटी कॅमेरात ही घटना कैद झाली आहे. या व्हिडीओत एक कार डिवायडरला टक्कर देऊन हवेत उडते. त्यानंतर पार्किंग स्लॉटमध्ये उभ्या असलेल्या कारवरून थेट एक रिकाम्या पार्किंग स्लॉटमध्ये जाऊन पडते. तेही अगदी योग्यपणे.
रेडिटवर पोस्ट करण्यात आलेल्या या व्हिडीओत एक वेगाने येणारी कार पार्किगमध्ये उभ्या असलेल्या एका कारला येऊन भिडते. मग ती कार हवेत उडते आणि दोन-तीन कारवरून जाऊन थेट पार्किंगमधील रिकाम्या जागी पडते. जणू कुणीतरी ती तशी पार्क केली. त्यानंतर कारमधील व्यक्ती खाली उतरून निघून जातो. या व्हिडीओवर लोकांच्या हजारो कमेंट्स आल्या आहेत. काही लोक तर कार चालकाला मास्टर ऑफ पार्किंग म्हणत आहेत. तर काही लोक याला एखाद्या सिनेमातील सीन म्हणत आहेत.
कारचा अपघात आणि नंतर कार पार्किंगमध्ये जाऊन पडणे यावरून लोक भरभरून कमेंट्स करत आहेत. हा अपघात असला तरी लोक ड्रायव्हरचं कौतुक करत आहेत. तर काही लोक वेंचुरा नावाच्या एका सिनेमातील हा सीन असल्याचं म्हणत आहेत. ज्यात जिम कॅरी हवेत असलेल्या कारला पलटी करतो आणि मग थेट पार्किंगमध्ये उभी करतो.