स्वामी तिन्ही जगाचा आईविना भिकारी असं म्हणतात. आईच्या प्रेमाची, तिच्या जिव्हाळ्याची तुलना जगात कशासोबतही करता येत नाही. जग स्वार्थी आहे. पण आई नाही. कारण तिचं प्रेमच निरपेक्ष आहे. देवाला सगळीकडे जाता येत नाही. म्हणूनच त्यानं आई निर्माण केली. आईच्या प्रेमाची प्रचिती देणारा एक व्हिडीओ सोशल मीडियावर व्हायरल झाला आहे.
एखाद्या सुपरहिरोप्रमाणे आपल्या लेकराचं रक्षण करणाऱ्या आईचा व्हिडीओ सोशल मीडियावर व्हायरल झाला आहे. लहानग्याच्या संरक्षणासाठी आईनं स्वत:चा जीव धोक्यात घातला आहे. भारतीय वन अधिकारी सुशांता नंदा यांनी हा व्हिडीओ शेअर केला आहे. या जगाला मातांची गरज आहे, असं नंदा यांनी ट्विटमध्ये म्हटलं आहे. नंदा यांनी ट्विट केलेला व्हिडीओ अंगावर काटा आणणारा आहे.
नंदा यांनी ट्विट केलेला व्हिडीओ १६ सेकंदांचा आहे. त्यात एक महिला तिच्या लहान मुलासह भिंतीला टेकून बसलेली दिसत आहे. मात्र अचानक तिला धोक्याची जाणीव होते. मागची भिंत पडणार असल्याचं तिच्या लक्षात येतं. ती कोसळणाऱ्या भिंतीला रोखण्याचा प्रयत्न करते. मात्र भिंत वेगानं कोसळू लागते. भिंतीतल्या विटा लेकरावर कोसळू नये म्हणून महिला भिंत बनून उभी राहते. कोसळणाऱ्या विटा महिलेवर पडतात. मात्र आई तिच्या लेकराला साधं खरचटू देत नाही. पुढच्या काही क्षणांत एक व्यक्ती तिथे येते. ती बाळाला कुशीत घेते. महिलादेखील उठून उभी राहते आणि ते तिथून निघून जातात.