पाटन: मोबाईलमध्ये स्फोट झाल्याच्या घटना वारंवार समोर येतात. आता गुजरातमधील पाटन येथील एका शोरूममधील एक व्हिडीओ समोर आला आहे. एक व्यक्ती गप्पा मारत असताना त्याच्या खिशातील मोबाईलमधून अचानक धूर येऊ लागला. त्यानं लगेच मोबाईल खिशातून काढून फेकला. हा संपूर्ण दुकानातील सीसीटीव्हीत कैद झाला आहे.
पाटनमध्ये असलेल्या एका शोरुममध्ये एक व्यक्ती बसला होता. तो अगदी आरामात बसून गप्पा मारत होता. त्याच्या खिशात असलेल्या मोबाईलमधून अचानक धूर निघू लागला. घाबरलेल्या व्यक्तीनं मोबाईल लगेच खिशातून काढला जमिनीवर फेकला. त्यानंतर मोबाईलचा स्फोट झाला. मोबाईलमधून धूर निघत असल्याचं वेळीच संबंधित व्यक्तीच्या लक्षात आल्यानं अनर्थ टळला.
मोबाईलमधून येणारा धूर आणि त्यानंतर झालेला स्फोट सीसीटीव्हीत कैद झाला. शुक्रवारी सकाळी १० च्या सुमारास ही घटना घडली. याआधी असाच एक व्हिडीओ एप्रिलमध्ये व्हायरल झाला होता. तो चीनमधील होता. अतिशय गर्दीच्या ठिकाणी एका व्यक्तीच्या बॅगमध्ये असलेल्या मोबाईलला आग लागली होती. हा व्हिडीओ सोशल मीडियावर व्हायरल झाला होता.