नवी दिल्ली – दिल्लीनजीक असलेल्या गाझियाबाद येथील साहिबाबाद येथे रात्री एका नवरदेवाला बेदम चोप देण्यात आला आहे. नवऱ्याला मारहाण करत असलेला व्हिडीओ सोशल मीडियावर मोठ्या प्रमाणात व्हायरल होत आहे. लग्नात नवरीच्या गळ्यात हार घालण्यापूर्वीच काही लोकांनी व्यासपीठावर येत नवऱ्याला फरफटत नेत मारहाण केली आहे. घडलेल्या प्रकाराने सगळेच अचंबित झाले. मात्र जेव्हा खरं समोर आलं तेव्हा लोकांनी म्हटलं हे योग्यच आहे.
नवऱ्याच्या घरातले करत होते बचाव, नवरीकडील मंडळी करत होते मारहाण
जवळपास दीड मिनिटांचा हा व्हिडीओ व्हायरल होत होत आहे. ज्यात नवरीच्या येथील काही लोकांनी नवऱ्याला फरफटत नेत मारहाण केली. नवऱ्याचे नातेवाईक त्याला वाचवण्याचा प्रयत्न करत होते. लग्नाच्या वेळी नवऱ्याच्या वडिलांनी १० लाख रुपये हुंडा देण्याची अट नवरीच्या कुटुंबाकडे केली. त्याचसोबत जर हे पैसे मिळाले नाहीत तर लग्न होणार नाही अशी धमकीही नवरीच्या कुटुंबाला दिली.
मात्र लग्नाआधीही मुलीच्या घरच्यांनी नवऱ्याकडच्या मंडळींना ३ लाख कॅश आणि १ लाखाची हिऱ्याची अंगठी दिली होती. परंतु इतकाच हुंडा नको असल्याने नवऱ्याच्या कुटुंबाचे मन भरलं नाही. त्यांनी लग्नातच १० लाख रुपयांची मागणी केली. मुलीच्या घरच्यांनी अथक प्रयत्न केले तरीही नवऱ्याकडील माणसांनी काहीच ऐकून घेतले नाही. त्यानंतर मुलीकडील माणसं संतापली त्यांनी नवऱ्याला मारहाण करण्यास सुरुवात केली. मात्र ही कहानी इथेच संपली नाही. तर नवऱ्याची सगळी पोलखोल झाली.
मुलीच्या घरच्यांनी दावा केला की, या नवऱ्याने याआधीही २-३ लग्न केली होती. मुलीच्या घरच्यांनी त्याचे फोटोही सर्वासमोर उघड केले. आरोपी नवरदेवाचं नाव मुज्जमिल आहे जो आग्रा इथं राहतो. मॅरेज हॉलमध्ये आरोपी नवऱ्याला मारहाण झाल्याचा व्हिडीओ व्हायरल झाला तेव्हा लोकांनी योग्यच केले असं म्हटलं आहे. मात्र ही पहिलीच घटना नाही तर देशात अनेकदा अशा घटना समोर आल्या. दारु पितो म्हणून मारहाण करत लग्न मोडल्याची बातमी आहे.