सोशल मीडियावर रिल्सचा पूर आलेला आहे. जो तो फेमस होण्यासाठी काय काय उद्योग करतोय देव जाणे. नुकतीच एक तरुणी रिल बनविण्यासाठी कार रिव्हर्स घेतली आणि दरीत कोसळली. तर पुण्यात बहुमजली इमारतीच्या छतावर तरुणी तिच्या मित्राच्या हाताला लटकलेली सर्वांनी पाहिली. आता बिहारमधून बातमी येत आहे.
बिहारच्या सीतामढीच्या एका तरुणीचा व्हिडीओ वेगाने व्हायरल होत आहे. दिल्लीपर्यंत मान्सून पोहोचला आहे. अशातच पावसाचा आनंद घेतेय हे जगाला दाखविण्यासाठी एक तरुणी इमारतीच्या टेरेसवर रिल्स बनवत होती. तितक्यात तिच्या बाजुलाच जोरदार वीज कोसळली.
बुधवारची ही घटना आहे. सीतामढ़ीच्या सिरसिया गावात राहणारी सानिया कुमारी ही शेजारच्याच्या टेरेसवर रिल्स बनवत होती. तिची मैत्रिण तिचा व्हिडीओ रेकॉर्ड करत होती. तेवढ्यातच बाजुला वीज कोसळली. थोडी बाजुला वीज कोसळल्याने दोघीही वाचल्या आहेत. परंतू विजेचा लोळ पाहता पुन्हा काही ती तरुणी पावसात जाण्यास धजावेल असे वाटत नाही.