Bride Stuck In Lift: सध्या सगळीकडे लग्नाचा सीझन सुरू आहे. त्यामुळे लग्नाबाबत अनेक वेगवेगळ्या धक्कादायक गोष्टी समोर येत असतात. अशीच एक घटना ठाणे जिल्ह्यातील भाईंदरमधून समोर आली. लग्नासाठी निघालेली नवरी बिल्डींगच्या लिफ्टमध्ये अर्धा तास अडकली. महिला सोमवारी रात्री लिफ्टमध्ये आपल्या नातेवाईकांसोबत अडकली होती. त्यानंतर बऱ्याच मेहनतीने तिला बाहेर काढण्यात आलं. या घटनेचा एक व्हिडीओ सोशल मीडियावर व्हायरल झाला आहे. क्लीपमध्ये लोक लिफ्टच्या दरवाज्याजवळ उभे असलेले दिसत आहेत आणि नवरीला बाहेर काढण्यासाठी प्रयत्न करत आहेत. नवरी काही मुलं आणि नातेवाईकांसोबत लिफ्टमध्ये अडकली आहे. काही मिनिटांनी लिफ्टचा दरवाजा उघडतो आणि आतील लोक बाहेर पळून येतात.
छोट्या लिफ्टमध्ये श्वास गुदमरल्याने एका महिला धापा टाकत बाहेर आली. व्हिडिओत बघू शकता की, लिफ्टमध्ये अडकलेला एक मुलगा खुर्चीवर बसला आहे आणि त्यालाही श्वास घेण्यास त्रास होत आहे. लोक त्याला पाणी पाजत आहे. तर नवरीलाही या घटनेने मोठा धक्का बसलेला दिसतोय.
मीडिया रिपोर्ट्सनुसार, सायंकाळी नवरी तिच्या तीन बहिणी आणि तिचे दोन अल्पवयीन नातेवाईक ग्राउंड फ्लोरवरून पहिल्या मजल्यावरील एका फ्लॅटमध्ये जाण्यासाठी लिफ्टमध्ये गेले. पण बटन दाबल्यावर लिफ्ट पहिल्या मजल्यावर न पोहोचता मधेच थांबली. त्यामुळे लिफ्टमधील सगळे लोक घाबरले.
घटनास्थळी उपस्थित नवरीचे नातेवाईक आणि काही लोकांनी त्यांना बाहेर काढण्याचा प्रयत्न केला. पण काही फायदा झाला नाही. त्यानंतर त्यांना बाहेर काढण्यासाठी मीरा भाईंदर नगर निगमच्या फायर ब्रिगेड बोलवण्यात आलं. रिपोर्टमध्ये सांगण्यात आलं की, बचाव दलाच्या जवानांनी लिफ्ट पहिल्या मजल्यावर आणली. ज्यानंतर आतील लोकांना बाहेर काढण्यात आलं. याआधीही अशा काही घटना समोर आल्या ज्यात लग्नाच्या दिवशी लोक लिफ्टमध्ये अडकले. सुदैवाने यातील सगळेजण सुरक्षित आहेत.