महिला अत्यांचारांचे प्रमाण दिवसागणिक वाढतच आहे. महिलांवरील अत्याचाराच्या अनेक घटना समोर येत असताना आता आसाममध्ये एका तरुणीसोबत छेडछाड झाल्याची घटना समोर येत आहे. या आधी काहीच दिवसांपूर्वी दिल्लीच्या (Delhi) हौज खास परिसरातील दोन मुलींची छेढ काढल्याचा व्हिडिओ व्हायरल (Viral Video) झाला होता. हा व्हिडिओही सोशल मिडियावर व्हायरल झाला आहे. व्हिडिओमध्ये तुम्ही पाहु शकता या मुलीनं छेड काढणाऱ्याला चांगलाच धडा शिकवलाय.
या तरुणीचं नाव भावना कश्यप असं आहे आणि तिनं स्वतः आपल्या फेसबुक पोस्ट करुन या संपूर्ण घटनेचा खुलासा केला आहे. भावनानं सांगितलं, की एक व्यक्ती तिच्या जवळ आला आणि तिला पत्ता विचारू लागला. यावर भावनानं आपल्याला हा पत्ता माहिती नसल्याचं सांगितलं. इतक्यात स्कूटीवर असलेल्या या व्यक्तीनं भावनाच्या प्रायव्हेट पार्टला हात लावण्याचा प्रयत्न केला. मात्र, भावनानंही संपूर्ण ताकत लावून या मुलाला पकडलं आणि त्याला पळू दिलं नाही. भावनानं आपल्या पोस्टमध्ये म्हटलं, की जेव्हा तो पळ काढू लागला तेव्हा मी माझी पूर्ण ताकत लावून त्याला मागे खेचलं. तो आपल्या स्कूटीचा स्पीड वाढवण्याचा प्रयत्न करत होता, मात्र मी अर्धा मिनिटापर्यंत गाडीचा मागचा टायर वरती उचलून धरला आणि मग जोरानं धक्का दिला. यामुळे स्कूटी रस्त्याच्या कडेला असलेल्या नाल्यात पडली.
भावनानं आपल्या पोस्टमध्ये या संपूर्ण घटनेची माहिती देण्यासोबतच एक व्हिडिओ आणि फोटोदेखील अपलोड केला आहे. जेणेकरून लोकांना व्यवस्थितरित्या समजेल, की तिच्यासोबत नेमकं घडलं काय. भावनाच्या म्हणण्यानुसार, ही घटना गुवाहाटीच्या जीएस रोडवर घडली आहे. आरोपीचं नाव मधुसना राजकुमार असं असल्याचं समोर आलं आहे. प्रकरण वाढत असल्याचं पाहता आसाम पोलिसांनी घटनास्थळी धाव घेत आरोपीला अटक केली आहे. भावनाची पोस्ट फेसबुक आणि इतर सोशल मीडिया प्लॅटफॉर्मवर व्हायरल होत आहे. तिच्या धाडसाचं सर्वत्र कौतुक होत आहे.