काळो कधी हाडतास?

मालवणी तडका

सकलो : कोनाक सांगतस काळो कधी हाडतस म्हनान? तुकलो : काळ्याक सगळेच कुरवाळतत. कुरवाळून कुरवाळून गोरो व्हतलो असा तेंका वाटता. सकलो : काळो कुरवाळून गोरो कसो काय व्हतलो?तुकलो : ताच सांगतय मरे. काळो तो काळोच. पन ह्या सरकार मागचा सरकार काळो भायर काढतलव म्हनान तुमका आमका सांगल्यांनी. आनी आता ढेंगा वर केल्यांनी. सकलो : सत्तेर इला की ढेंगा वर करूची जुनी पध्दत हा. पन काळो हाडूक काय प्रॉब्लेम हा?तुकलो : तो इतको काळो हा की तो गोरो व्हताना नाकेनव व्हतले, असा भोवतेक सरकाराक वाटता हा. सकलो : सरकाराक वाटता ता वाटताच. पन कोनची कोनची तोंडा काळी व्हतली, ता पन भोवतेक सगळ्यांका म्हायती हा. तुकलो : म्हायती हासतलाच. सरळ सरळ जर हयलो पैसो भायर ठेवलो जाता, तो हाडूचेसाठी किती वर्सा घालवल्यांनी? सकलो : तवसर त्या काळ्याची जेंचो हा ते विल्हेवाट लावन मोकळे झाले आसतले. तुकलो : तेचेसाठीच ह्यो वेळकाढूपना चालू हा. कोनचो नाय कोनचो तरी सगोसोयरो भुतूर आडाकललो आसतलोच. सकलो : अरे भोवेतक सरकाराक म्हंजे खयल्याव सत्तेत आसनाऱ्या सरकाराक रसद पुरवाचा काम पन हे काळ्याचे मालक मदत करीत आसतले. तुकलो : सरळ हा. तेचे शिवाय असा कसा व्हयत. आपून धुतल्या तांदळाचे आसव असा इरोधात बसान आरडाक काय हरकत हा? सकलो : इरोधात आसताना आरडायचा आनी सत्तेत इला की गप्प रवायचा म्हंजे झाला. तुकलो : सरकार तसाच चालवचा आसता. आराडनारे आरडत रवतले. आपून खाली मान घालून गप्प आयकत रवायचा. सकलो : इरोधक काळे छत्र्यो घेवन वर काळो पैसो परत हाडा म्हनान लिवलला दाखयत आरड घाली व्हते. तुकलो : त्यो छत्र्यो बघून लोकसभेच्यो अध्यक्ष सुमित्रा महाजन नाराज झाल्यो. पन काळो पैसो काया गोरो व्होवची चिन्हा दिसनत नाय. सकलो : अरे बाबा, सगळेच चोराचे भागीदार हत. कोनाकच काळो पैसो भायर काढूची मनापासून इच्छा नाय हा. वगीच आपला तुमका-आमका वाटता, काळो पैसो हाडल्यांनी की आमची श्रीमंत व्हतलव. तुकलो : पयला पयला तसाचा भावल्यांनी. इतको पैसो हा की तो देशात हाडलो की सगळे श्रीमंत व्हतले. पन आता म्हनतत थोडोच हा. सकलो : आकडो फिक्स व्हना नाय, तवसर खरा काय खोटा काय कळना कठीन हा. तुकलो : पंधरा दिवसांपूर्वी काय काय नावा पन टीवीर झळाकली. परत बंद झाला. सकलो : अरे बाबा, बरे बरे भुतूर आडाकलले आसतले म्हनान ते नावाच जाहीर करूक बघनत नाय. तुकलो : अरे लक्ष्मीक अंधारात ठेवना म्हंजे जेंचो पैसो असो काळो म्हनान हा तेंचा निसंतान व्हतला. सकलो : हैता मातर येकदम बरोबर हा. खोट्यान जो कोन चललो हा तेच खोटाच व्होवदे आनी तेचो सत्यानाश व्होवदे. नायतर कायदो काय करीस्तरवर सगळे ‘वर’ गेलले आसतले. तुकलो : अगदी बरोबर. कायदो आमचो इतको स्लो राबवनारे हत की काळो तकडेच गोरो व्होवन येतलो. सकलो : आनी आमी आपले म्हनतव सगळो काळो पैसो भारतात इलो म्हंजे हाडलो तर आमचो भारत सुजलाम सुफलाम व्हयत. पन हयसर सुजलाम सुफलाम तुझ्यापेक्षा माझा लांब असा झाला हा. तुकलो : मेल्यांका इतको पैसो व्हयो कित्या? जाताना काय ‘वर’ घेवन जातले की काय? सकलो : कोन वर घेवन जावचो नाय. तुकलो : सगळा बघून आनी आयकान आपनाक मातर किळस येता. खुर्चेर बसले की गप्प आनी रस्त्यार इले की आरड सुरू. सकलो : चर्चा करूक तयार हत मरे. तुकलो : अरे चर्चा करून तेचा पानी झाला. हळूहळू हाताकच काय लागाचा नाय. उलट तेच म्हनतीत खय हा काळो पैसो?सकलो : तसाव व्हयत. पन शेवटी कोन कोनाक फसवतलो?तुकलो : वरच्याक कोनच फसवचो नाय. तो बरोबर ‘कॅमेरो’ लावन बसललो हा. व्हळेर इलो की तो चाप वढतलो आनी मगे एकलगो पडतलो. तवसर आमी रान काढया. काय? - विजय पालकर