तळेरे , 2 : राज्य ज्युदो स्पर्धा, राष्ट्रीय निवड चाचणी स्पर्धेसाठी राज्यभरातील २५ जिल्ह्यातून ५५० पेक्षा अधिक खेळाडूंनी हजेरी लावली आहे. या स्पर्धेत सिंधुदुर्ग जिल्ह्यातील १६ ज्युदो खेळाडूंनी विविध वजनगटात सहभाग घेतला असून सिंधुदुर्ग जिल्हा ज्युदो असोसिएशनच्यावतीने खेळताना या सर्वच खेळाडूंनी उत्तम कामगिरी करत जिल्ह्याची वेगळी छाप उमटविली. आपआपल्या वजनगटातून खेळताना कणकवली तालुक्यातील कासार्डे हायस्कूलचा खेळाडू सोनू राजू जाधव व सावंतवाडीची खेळाडू संजना आंबाड या दोन्ही खेळाडूंनी कांस्यपदकांनी जिल्ह्याचे खाते उघडले आहे.
ज्युदो हा क्रीडा प्रकार मूळ भारतीय आहे. येथून तो चीन, जपान व त्यानंतर अमेरिकेत गेला आणि अमेरिकेतून परत भारतात आला. असा या खेळाचा प्रवास आहे. हा खेळ मुळात भारतीय असल्याचा प्रत्येकाने अभिमान बाळगून या खेळाचा नावलौकीक वाढविण्यासाठी प्रयत्न करावेत, असे आवाहन पोलीस अधीक्षक डॉ. दिलीप पाटील-भुजबळ यांनी केले.
जिल्हा क्रीडा संकुलातील ‘इनडोअर स्टेडियम’ येथे अमॅच्युअर ज्युदो असोसिएशन गोंदिया व महाराष्ट्र ज्युदो संघटनेच्या संयुक्त विद्यमाने ४५ व्या राज्यस्तरीय सब ज्युनियर मुले-मुलींच्या ज्युदो स्पर्धेचे उदघाटन डॉ. भुजबळ यांच्या हस्ते करण्यात आले. यावेळी ते बोलत होते.
यावेळी प्रमुख पाहुणे म्हणून महाराष्ट्र ज्युदो संघटनेचे सचिव दत्ता आफळे, उपाध्यक्ष राजकुमार पुंडकर, सहसचिव डॉ. गणेश शेटकर, कोषाध्यक्ष रवी मेटकर, जिल्हा माहिती अधिकारी विवेक खडसे, मनोहर बनगे, अ‍ॅड. सुधीर कोंडे, नरिसंग यादव, पुरूषोत्तम चौधरी, जिल्हा अमॅच्युअर असोसिएशनचे अध्यक्ष अजितसिंह गौर, संयोजक अपूर्व अग्रवाल, सचिव राजेश गायधने उपस्थित होते.
डॉ. भुजबळ पुढे म्हणाले की, पोलीस प्रशिक्षणात ज्युदो क्रीडा प्रकार अत्यंत महत्त्वाचा आहे. आत्मसंरक्षणासाठी ज्युदोची भूमिका महत्त्वाची आहे. गोंदिया जिल्हा हा आदिवासीबहुल, दुर्गम व नक्षलग्रस्त असूनसुध्दा या खेळाच्या राज्यस्तरीय स्पर्धेचे आयोजन केल्याबद्दल त्यांनी आयोजकांचे कौतुक केले. या स्पर्धेच्या आयोजनामुळे गोंदियाचा नावलौकीक वाढण्यास मदत झाली असल्याचे त्यांनी सांगितले. समाजाचे रक्षण करण्यासाठी मुलींनी ज्युदोचे चांगले प्रशिक्षण घेऊन दुर्गेच्या अवतारातून पुढे आले पाहिजे, असेही ते म्हणाले.
राज्य किंवा राष्ट्रीय स्तरावर या स्पर्धेत सहभागी असल्याचे प्रमाणपत्र असल्यास खेळाडूला नोकर भरती प्रक्रियेत ५ टक्के खेळाडू आरक्षणाचा लाभ मिळत असल्याचे त्यांनी सांगितले.
आफळे म्हणाले की, ज्युदो खेळामुळे आरोग्य सुदृढ राहण्यास मदत होते. ज्युदोच्या विकासासाठी सर्वांनी सहकार्य करण्याची आज गरज आहे. महाराष्ट्राच्या मातीत खेळावर प्रेम करणारी मंडळी मोठ्या प्रमाणात आहेत. राज्याची खेळाची परंपरा ही उज्ज्वल आहे. या खेळाच्या वाढीसाठी समाजातील अनेक घटक आज पुढे येत आहेत, ही आनंदाची बाब आहे. ज्यांनी या खेळात खेळाडू म्हणून सुरुवात केली ते पुढे जाऊन आंतरराष्ट्रीय पंचांपर्यंत पोहोचतील, असे त्यांनी सांगितले.
अपूर्व अग्रवाल म्हणाले, या स्पर्धेच्या निमित्ताने आतापर्यंत सर्वात जास्त ज्युदो खेळाडू गोंदिया येथील स्पर्धेत सहभागी झाले आहे. राज्यस्तरीय स्पर्धेचे आयोजन करण्याचा मान गोंदिया जिल्ह्याला मिळाला आहे. या स्पर्धेत जे खेळाडू यशस्वी होतील ते देशपातळीवर राज्याचा नावलौकीक करतील, असा विश्वासही त्यांनी व्यक्त केला.
यावेळी ज्युदो खेळासाठी योगदान देणारे पुणे येथील अ‍ॅड. सुधीर कोंडे यांचा शाल, श्रीफळ देऊन डॉ. भुजबळ यांच्या हस्ते सत्कार करण्यात आला. विविध जिल्ह्यातून आलेले स्पर्धक मुले-मुली, पंच व मुलांचे पालक मोठ्या संख्येने उपस्थित होते. चारशेहून अधिक स्पर्धकांचा सहभाग या स्पर्धेत असून सन २०१७-१८ ची राष्ट्रीय निवड चाचणीसुध्दा या स्पर्धेतूनच होणार आहे.