आॅनलाईन लोकमत
मालवण, दि. ९ : मालवण बंदर परिसरात रमेश मांजरेकर याच्यावर एकाने चाकूचे सपासप वार केल्याची घटना रविवारी सकाळी घडली. या प्रकाराने मालवण परिसरात मोठी खळबळ उडाली आहे. याप्रकरणी मांजरेकर यांनीच पोलिसांत तक्रार दिली असून त्यांच्यावर ग्रामीण रुग्णालयात उपचार सुरु आहेत.
बंदर परिसरात चाकूने हल्ला केल्याचे समजताच नागरिकांनी तेथे धाव घेतली. याप्रकरणी खाची मस्ती मांजरेकर यांच्या जीवावर बेतली असल्याची चर्चा सुरु होती.
रविवारी सकाळी बंदर परिसरात रमेश मांजरेकर आले असता त्यांच्यावर दारुच्या नशेत असलेल्या विश्वास मेस्त यांनी चाकूने वार केले. त्यात मांजरेकर हे गंभीर जखमी झाले. मांजरेकर यांच्या कुशीत आणि छातीवर वार झाले आहेत. त्यांना मालवण येथील ग्रामीण रुग्णालयात दाखल केले. त्यांच्यावर उपचार सुरु आहेत. याप्रकरणी मांजरेकर यांनी पोलिस ठाण्यात मेस्त यांच्याविरोधात तक्रार दाखल केली असून पोलिस अधिक तपास करत आहेत.
दरम्यान, पोलिस कर्मचारी नसल्याचे कारण सांगून या तक्रारीकडे पोलिस खात्याकडून दुर्लक्ष झाल्याचा आरोप मांजरेकर यांनी केला आहे. वेळीच पोलिसी हिसका दाखविला असता तर अनर्थ टळला असता, असे त्यांचे म्हणणे आहे. याप्रकरणी पोलिस अधीक्षक अमोघ गावकर यांनी लक्ष घालण्याची मागणी होत आहे.