वैभववाडीजवळ भीषण अपघातातून कर्नाटकचे पाचही तरुण बचावले

सिंधुदुर्गातील तळेरे कोल्हापूर राष्ट्रीय महामार्गावर एडगाव येथे रात्री 10 च्या सुमारास भीषण दुर्घटना घडली.

वैभववाडी(सिंधुदुर्ग): सिंधुदुर्गातील तळेरे कोल्हापूर राष्ट्रीय महामार्गावर एडगाव येथे रात्री 10 च्या सुमारास भीषण दुर्घटना घडली. महामार्ग मधोमध खचल्याने कोल्हापूरहून वैभववाडीकडे येणारा ट्रक खड्ड्यात दणकून कोल्हापूरकडे निघालेल्या कारवर कोसळला. त्यामुळे कारचा ट्रकखाली सापडून चुराडा झाला. कारमधील चौघांना नागरिकांनी तातडीने बाहेर काढले. परंतु कारमध्ये अडकलेल्या युवकाने दीड तास मृत्यूशी झुंज दिली. दोन जेसीबी आणि क्रेनच्या सहाय्याने ट्रक उभा केल्यानंतर नागरिकांच्या अथक परिश्रमांमुळे कारमध्ये अडकलेल्या चालकाला बाहेर काढण्यात यश आले. कारमधील पाचपैकी तिघे किरकोळ जखमी झाले आहेत. कर्नाटकातील ते पाच तरुण गोव्याहून कोल्हापूरमार्गे मुंबईला निघाले होते. अपघातामुळे दोन्ही बाजूंना दोन किलोमीटर पर्यंत वाहनांची रांग लागली होती. रात्री सव्वादहाच्या सुमारास ठप्प झालेली वाहतूक मध्यरात्री उशिरापर्यंत सुरळीत झाली नव्हती.