सिलिंडर असणाऱ्यांचे रॉकेल होणार बंद

सामान्यांचा प्रश्न : ४२ हजार ग्राहकांना फटका

सिंधुदुर्गनगरी : ज्या ग्राहकांचे एक गॅस कनेक्शन आहे त्यांना रेशनवर मिळणारे रॉकेल गायब झाले आहे. या महिन्यापासून याची अंमलबजावणी जिल्हा पुरवठा विभागाच्या माध्यमातून सुरु झाली आहे. त्यामुळे जिल्ह्यातील ४१ हजार ९७५ गॅस ग्राहकांना याचा फटका बसला आहे. यापूर्वी दोन गॅस सिलिंडर ग्राहकांचे रॉकेल बंद करण्यात आले होते. तर २० आॅगस्टला राज्य शासनाने एक जरी गॅस सिलिंडर असला तरी ग्राहकांचे रॉकेल बंद करण्याचा निर्णय घेतला आहे. या निर्णयाची अंमलबजावणी या महिन्यापासूनच सुरु झाली आहे. हा शासन निर्णय होण्यापूर्वी या ग्राहकांना रेशनकार्डवर चार लीटर रॉकेल मिळत होते. परंतु आता हे पूर्ण बंद झाले आहे. त्याबरोबर बिगर गॅसधारकांचेही रॉकेल कमी करण्यात आले आहे. कुटुंबातील व्यक्तीनुसार रॉकेल पुरवठा केला जात आहे. यामध्ये एका व्यक्तीसाठी ४ लिटर रॉकेल मिळत आहे. शासनाने ग्रामीण व शहरी भागामध्ये एकच प्रमाण ठेवले आहे अशी माहिती जिल्हा पुरवठा विभागाकडून देण्यात आली व शासनाच्या या निर्णयाची अंमलबजावणी सुरु असून इथून पुढे बिगर गॅसधारकांनाच रॉकेल मिळणार आहे व तेही शासनाच्या धोरणाप्रमाणेच अशीही माहिती देण्यात आली. सार्वजनिक वितरण व्यवस्थेंतर्गत जिल्ह्यातील ४१ हजार ९७५ गॅस ग्राहकांना केरोसिनचे वितरण बंद करण्यात आले आहे. रास्त भाव दुकानांमधून मिळणारे केरोसिन मिळत नसल्याने आता केरोसिन आणणार कोठून असा पेच जिल्ह्यातील गॅस सिलिंडर ग्राहकांसमोर निर्माण झाला आहे. सार्वजनिक वितरण व्यवस्थेंतर्गत एक गॅस सिलिंडरधारक ग्राहकांना दोन लीटर केरोसिनचे वितरण रास्त भाव दुकानांमधून करण्यात येत होते. परंतु राज्यातील शहरी व ग्रामीण भागातील गॅस सिलिंडर ग्राहकांना दरमहा वितरीत करण्यात येणारे केरोसिनचे वितरण बंद करण्यात येत असल्याचा निर्णय शासनाच्या अन्न व नागरी पुरवठा विभागामार्फत २० आॅगस्ट २०१५ रोजी घेण्यात आला. (प्रतिनिधी) ग्राहकांसमोर पेच : पुरवठा बंद झाल्याची माहिती ४सार्वजनिक वितरण व्यवस्थेमध्ये दरमहा मिळणारे केरोसिन मिळत नसल्याने गॅस सिलिंडर संपल्यानंतर नवीन सिलिंडर उपलब्ध होईपर्यंत स्वयंपाक व इतर कामासाठी उपयोगात येणारे केरोसिन आता कोठून आणणार असा प्रश्न जिल्ह्यातील गॅस सिलिंडर ग्राहकांसमोर निर्माण झाला आहे. ४सिंधुदुर्ग जिल्ह्यात दोडामार्ग -२२६०, सावंतवाडी - ६३८०, वैभववाडी - ७३३, कुडाळ - ९१५७, मालवण - ४५९५, कणकवली - ११७१७, वेंगुर्ला - ३८१३ व देवगड - ३३२० असे एकूण ४२ हजार ९७५ गॅस ग्राहकांचा रॉकेल पुरवठा बंद करण्यात आला असल्याची माहिती पुरवठा विभागाकडून देण्यात आली.