वाई : मागील काही महिन्यांत कमी झालेल्या कोरोनाने पुन्हा डोके वर काढले आहे. नागरिकांमध्ये नियम पाळण्यामध्ये ढिलाई होत आहे. यामुळे धोका वाढला असून, नागरिकांनी प्रतिबंधक उपाय काटेकोर पाळावेत, असे आवाहन भाजप महिला मोर्चा जिल्हाध्यक्ष सुरभी भोसले यांनी केले.
नगराध्यक्षा डॉ. प्रतिभा शिंदे, महिला मोर्चा अध्यक्ष शुभदा नागपूरकर, नगरसेविका वासंती ढेकाने, नगरसेविका रूपाली वनारसे यांची प्रमुख उपस्थिती होती.
भारतीय जनता पार्टी वाई शहराच्या वतीने नेहमीच वेगवेगळ्या पद्धतीचे तसेच लोकोपयुक्त विविध उपक्रम राबवले जातात. याचाच एक भाग म्हणजे महिलांच्या वतीने दरवर्षी साजरा केला जाणारा हळदीकुंकू कार्यक्रम.
या वर्षी रथसप्तमीच्या शुभ मुहूर्तावर हा कार्यक्रम एका वेगळ्या व अनोख्या पद्धतीने साजरा केला गेला. वाई शहरामध्ये रोज भरणाऱ्या बाजारामध्ये अनेक महिला भगिनी आजूबाजूच्या गावांमधून तरकारी विक्री करण्यासाठी वाईमध्ये येतात. त्यांच्याबरोबर अनेकदा लहान मुले-मुली असतात. सध्या चालू असणाऱ्या कोरोनाच्या आपत्कालीन काळामध्ये मास्कची उपयुक्तता आपण सर्व जण जाणतोच. हीच गोष्ट लक्षात घेऊन शुक्रवारी झालेल्या हळदी-कुंकू कार्यक्रमामध्ये भाजप महिलांनी या तरकारी विक्रीसाठी बसलेल्या महिलांना हळदी-कुंकू करून सध्याच्या आपत्कालीन काळामध्ये अत्यंत उपयोगी असणारे मास्कचे वाण म्हणून वाटप केले. तसेच महिलांसाठी सुरू केलेल्या विविध उपयुक्त योजनांचे पत्रकही दिले. या कार्यक्रमासाठी माजी नगरसेविका मीनल इनामदार, जिल्हा महिला सरचिटणीस ज्योती गांधी, वाई शहर भाजप सरचिटणीस मनीषा घैसास, सरचिटणीस तनुजा इनामदार, उपाध्यक्षा शश्मिता जैन, स्वाती केंडे, महिला मोर्चा सरचिटणीस सुषमा शिंदे, महिला मोर्चा उपाध्यक्ष रूपाली गव्हाणे, विनया सुरत्राण, महिला चिटणीस भारती कुलकर्णी, हर्षदा रानडे, राधा फुले आदी उपस्थित होत्या.