कोरेगाव : कोरेगाव शहरात मॅफको कंपनीच्या जागेत सुसज्ज नाट्यगृह उभारले जाणार असून, आमदार महेश शिंदे यांनी केलेल्या प्रयत्नांना यश आले आहे. राज्य शासनाने त्यासाठी ९ कोटी रुपयांची तरतूद केली आहे. याबाबत शासनाने बुधवारी आदेश काढले आहेत.
आमदार महेश शिंदे युवा मंचचे पदाधिकारी राहुल प्र. बर्गे व माजी नगराध्यक्ष राजाभाऊ बर्गे यांनी याबाबत पत्रक प्रसिध्दीस दिले असून, त्यामध्ये त्यांनी नमूद केले आहे की, स्वरराज छोटा गंधर्व यांची जन्मभूमी असलेल्या कोरेगावला मोठी सांस्कृतिक परंपरा आहे. सुसज्ज नाट्यगृह नसल्याने नाट्यप्रेमींसह सांस्कृतिक क्षेत्रातील मान्यवरांची अडचण होत होती. ही बाब लक्षात घेऊन आमदार महेश शिंदे यांच्या नेतृत्वाखालील नगरसेवकांच्या शिष्टमंडळाने नगरविकास मंत्री एकनाथ शिंदे यांची काही महिन्यांपूर्वी भेट घेतली होती. त्यांना नाट्यगृहाचा प्रस्ताव सादर केला होता.
मुख्यमंत्री उध्दव ठाकरे यांच्या सूचनेनुसार नगरविकास मंत्री एकनाथ शिंदे यांनी नाट्यगृह उभारणीस मान्यता दिली आहे. पर्यावरण मंत्री आदित्य ठाकरे व गृहराज्य मंत्री शंभूराज देसाई यांनी त्यासाठी विशेष सहकार्य केले आहे. नगरविकास विभागाचे अवर सचिव विवेक कुंभार यांच्या स्वाक्षरीने दि. १६ जून २०२१ रोजी अध्यादेश काढण्यात आला आहे. त्यामध्ये कोरेगावमध्ये नाट्यगृह निर्मितीसाठी ९ कोटी रुपये मंजूर करण्यात आले आहेत. शासन शंभर टक्के रक्कम देणार असून, नगरपंचायतीला एकही रुपया खर्च करावा लागणार नाही. या नाट्यगृहामुळे कोरेगावनजीकच्या काळात सांस्कृतिक राजधानी म्हणून लौकिक पावेल, असा विश्‍वास राजाभाऊ बर्गे यांनी व्यक्त केला.
(चौकट)
जनतेच्या कल्पनेतून साकारणार नाट्यगृह
जनतेच्या कल्पनेतून हे नाट्यगृह व्हावे, अशी आमदार महेश शिंदे यांची इच्छा आहे. नाट्यगृह कसे असावे, भौतिक सुविधा कोणत्या असाव्यात, त्याची रचना कशी केली गेली पाहिजे, याबाबत साहित्य, सांस्कृतिक क्षेत्रातील मान्यवरांसह विद्यार्थी सुध्दा सूचना करू शकतात, नाट्यगृहाबाबत सूचना कळवाव्यात, असे आवाहन राजाभाऊ बर्गे यांनी केले आहे.