मराठी हौशी राज्य नाट्य स्पर्धेचे केंद्र साताऱ्यात व्हावे, उदयनराजे भोसलेंची मंत्री मुनगंटीवारांकडे मागणी

सातारा : राज्याच्या सांस्कृतिक विभागाच्या वतीने दरवर्षी आयोजित करण्यात येणार्‍या मराठी हौशी राज्य नाट्य स्पर्धेचे केंद्र सातारा येथे सुरू करावे, अशी मागणी खासदार उदयनराजे भोसले यांनी राज्याचे वन व सांस्कृतिक मंत्री सुधीर मुनगंटीवार यांच्याकडे केली.खासदार उदयनराजे यांनी मंगळवारी मंत्री मुनगंटीवार यांची मुंबई येथील निवासस्थानी भेट घेऊन त्यांना मागणीचे निवेदन दिले. तसेच भवानी तलवारीची प्रतिकृती भेट देऊन त्यांचे अनोख्या शैलीत स्वागतही केले. ही भेट नक्कीच मला नवी ऊर्जा आणि बळ प्रदान करेल, असा विश्वास यावेळी मंत्री सुधीर मुनगंटीवार यांनी व्यक्त केला.याप्रसंगी रंगकर्मी व सातारा नगरपालिकेचे माजी नगरसेवक कल्याण राक्षे, पंकज चव्हाण, सह्याद्री प्रतिष्ठानचे अध्यक्ष श्रमिक गोजमगुंडे, काका धुमाळ, विनीत पाटील आदी उपस्थित होते.