सातारा : चार दिवस लागून आलेल्या सलग सुट्यांमुुळे राज्यभरातील पर्यटकांनी आपला मोर्चा पर्यटनस्थळांकडे वळविला आहे. प्रामुख्याने महाबळेश्वर, पाचगणीला भेट देणाऱ्या पर्यटकांची संख्या सर्वाधिक असून, वाहनांमुळे पुणे-बेंगलोर महामार्गावर वाहतुकीची कोंडी होत आहे. शनिवारी आनेवाडी तसेच तासवडे टोलनाक्यावर वाहनांच्या रांगाच रांगा लागल्या होत्या.शनिवार, रविवार तसेच बुद्ध पौर्णिमा व कामगार दिनानिमित्त बॅँका तसे शासकीय कार्यालयांना सलग चार सुट्या जोडून आल्या आहेत. त्यामुळे बाहेरगावी फिरण्यासाठी नागरिक मोठ्या प्रमाणात घराबाहेर पडले आहेत.
थंड हवेचे ठिकाण असणाऱ्या महाबळेश्वर व पाचगणीला भेट देणाऱ्या पर्यटकांची संख्या सर्वाधिक आहे. त्यातच पर्यटकांचा मुख्य हंगाम सुरू झाल्याने याठिकाणी पर्यटक संख्या दिवसेंदिवस वाढू लागली आहे.वाहनांच्या संख्येने शनिवारी पुणे-बेंगलोर महामार्गावर ठिकठिकाणी वाहतुकीची कोंडी झाली. खंबाटकी घाटातील वाहतुकही संथ गतीने सुरू होती. आनेवाडी तसेच तासवडे टोल नाक्यावर वाहनांच्या सकाळपासूनच रांगा लागल्या होत्या.