जनमानसातील एस.टी. ची प्रतिमा उंचावूया!

प्रतापसिंह सावंत : वडूज आगाराच्या कर्मचाऱ्यांशी साधला संवाद

वडूज : ‘संस्थेच्या हितासाठी काम करणे माझे कर्तव्य आहे. कारण ही संस्था माझे व माझ्या कुटुंबाचे हीत जोपासते. प्रसंगी निर्माण होणारे प्रश्न समोपचाराने सोडविले तर हा वडूज आगार सुस्थितीत चालेल. तसेच प्रवाशांना चांगली सेवा देऊन जनमानसातील एस.टी. ची. प्रतिमा उंचावूया,’ असे भावनिक आव्हान प्रादेशिक व्यवस्थापक प्रतापसिंह सावंत यांनी केले.येथील आगारामध्ये चालक, वाहक, मेकॅनिक, व कर्मचाऱ्यांशी संवाद साधताना ते बोलत होते. यावेळी आगारप्रमुख आलेकरी, के. टी. पाटील, संजय गुजर, सुनील मदने, अप्पासाहेब यादव, शिवाजी देशमुख आदींची प्रमुख उपस्थिती होती.सावंत म्हणाले, ‘वर्षातून एकदाच गॅरेजला जाणारी खासगी वाहने व्यवस्थित असतात. मात्र, आपली एस. टी. बस दररोज वर्कशॉपला येऊनही तिची दुरवस्था का? कारण कमतरता काय तर इच्छाशक्तीचा अभाव दिसून येतो. पैसे देऊन प्रवाशांनी एस. टी. बसमध्ये का बसावे? त्यासाठी आता मला हे बदलावयाचे आहे. या स्वच्छ भावनेतूनच नवीन उभारी घेऊन काम करूया, अशी वास्तव भूमिका मांडली. घराला शिस्त लावताना काही वेळा कटू निर्णय घ्यावे लागतात. पगारापुरते काम करून चालणार नाही. कारण शासनाचे टप्पा वाहतूक सुरू करण्याचे प्रयत्न सुरू केले आहेत. एस. टी. ची. प्रतिमा उंचाविली तर अप्रत्यक्ष फायदा आपल्या वैयक्तिक जीवनामध्ये होत असतो.’दरम्यान, प्रादेशिक व्यवस्थापक सावंत यांनी वडूज आगारामध्ये वर्कशॉप व गाड्यांची तपासणी केली. त्यानंतर चालक, वाहक मेकॅनिक व कर्मचाऱ्यांशी त्यांनी सविस्तर चर्चा करून अडीअडचणी समजून घेतल्या. याप्रसंगी मनसे संघटना व कामगार संघटनेच्या वतीने त्यांचा सत्कार केला.चालक अप्पासाहेब यादव यांनी शिस्त, स्वच्छता व काम हा त्रिसूत्री कार्यक्रम राबविला तर हा डेपो निश्चितच नफ्यात येईल, असा मानस व्यक्त केला. तर कामगार संघटनेचे सुनील मदने यांनी बसेसमध्ये साठच्या वेगाला लॉक केल्यामुळे डिझेल बचत करताना अडचणी येत असल्याचे स्पष्ट केले. याप्रसंगी भरत राऊत, राजेंद्र जाधव, डी. टी. जाधव, संदीपान देशमुख आदींसह चालक, वाहक, मेकॅनिक व कर्मचारी उपस्थित होते. (प्रतिनिधी)खाऊन माजा; पण टाकून माजू नकाआगारातील प्रत्येक गाडीचे आॅईल गळती पाहून सावंत यांनी प्रापंचिक उदाहरण देताना म्हणाले, ‘घरातील महिला गोडतेलाचा वापर करताना त्या भांड्याला बोट लावून तो तेलाचा थेंब पुन्हा भांड्यात टाकते, कारण तिला प्रपंच करायचा असतो. तसेच आपण ही आपल्यात बदल केला पाहिजे.सद्य:स्थितीतील व प्रापंचिक उदाहरणांचे दाखले देऊन सावंत यांनी वास्तव भूमिकेचे स्पष्टीकरण दिले. यामध्ये त्यांनी चौफेर टोलेबाजी करत उपस्थित कर्मचाऱ्यांची मने जिंकली. तसेच काम करणाऱ्यांची पाठ थोपटा व काम न करणाऱ्याला रपाटा (शाब्दिक) द्या, असे म्हणताच हास्यकल्लोळ झाला.