चाफळ : चाफळ विभागातील कोळेकरवाडी या डोंगरपठारावर दुर्गम भागात वसलेल्या गावाला रस्ता नसल्याने ग्रामस्थांना अनेक अडचणींचा सामना करावा लागत होता. कोळेकरवाडीकरांची रस्त्याची ही गैरसोय दूर करण्यासाठी गृहराज्यमंत्री शंभूराज देसाईंनी विशेष पाठपुरावा करीत या रस्त्याचा प्रश्न मार्गी लावला आहे. यासाठी वनविभागाच्या मान्यतेसह आवश्यक असणारा ८८ लाख रुपयांच्या निधीची तरतूद करणार आहे,’ अशी ग्वाही देसाईंनी दिली.
दरम्यान, बांधकाम विभागाचे ए. एम. जाधव, एस. आर. भोसले, मल्हारपेठ वनपाल एस. बी. भट, वनरक्षक विलास वाघमारे व अधिकाऱ्यांनी शिंगणवाडी ते कोळेकरवाडी या दोन किलोमीटर ३५० मीटर रस्त्यापैकी वन हद्दीत येणाऱ्या १ किलोमीटर ६५० मीटर रस्त्याचे सर्वेक्षण पूर्ण केल्याने कोळेकरवाडी ग्रामस्थांनी समाधान व्यक्त केले आहे.
चाफळ विभागातील कोळेकरवाडी व वनवासवाडी या डोंगराच्या कुशीत वसलेल्या गावांना रस्त्याची सुविधा नाही. याबाबत ग्रामस्थांनी गृहराज्यमंत्री शंभूराज देसाई यांच्यासमोर प्रश्न मांडले होते. मंत्री शंभूराज देसाई यांनी अप्पर जिल्हाधिकारी रामचंद्र शिंदे, उपवनसंरक्षक डॉ. भारतसिंह हाडा, जिल्हा परिषद मुख्य कार्यकारी अधिकारी विनय गौडा, सार्वजनिक बांधकाम विभागाचे अधीक्षक अभियंता एन. एम. वेदफाटक, जिल्हा परिषदेच्या बांधकाम विभागाचे कार्यकारी अभियंता एन. टी. भोसले, तत्कालीन वनाधिकारी विलास काळे व उपअभियंता आर. एस. भंडारे यांच्या उपस्थितीत तातडीची बैठक घेत या रस्त्याच्या कामास वनविभागाची मान्यता देऊन निधीची तरतूद करण्यासंदर्भात सुचित केले होते.
या बैठकीत ग्रामस्थांच्या मागणीनुसार शिंगणवाडी ते कोळेकरवाडी पोहोच रस्ता करण्याबाबत निर्णय घेण्यात आला. या रस्त्याअंतर्गत १२० मीटर क्षेत्र शिंगणवाडी ग्रामपंचायत हद्दीतील आहे. पुढील आठशे मीटर लांबीचे क्षेत्र वनविभागातील आहे; तर उर्वरित सुमारे चारशे मीटर लांबीचे क्षेत्र डेरवण ग्रामपंचायत हद्दीतील आहे. रस्त्याची एकूण लांबी १ हजार ३२० मीटर असून, रुंदी साडेसात मीटर आहे. त्याप्रमाणे अंदाजपत्रक तयार करण्यात आले असून, यासाठी सुमारे ८७ लाख ७७ हजार रुपये निधीची गरज आहे. प्रथमत: या रस्त्याच्या कामांकरिता आठशे मीटर वनविभागाच्या लांबी क्षेत्रास मान्यता देऊन आवश्यक असणारा ८८ लाख रुपयांच्या निधीची तरतूद करण्याचे बैठकीत ठरविण्यात आले. त्याप्रमाणे वनविभाग व बांधकाम विभागाचे अधिकारी यांच्या उपस्थितीत रस्त्याचे सर्वेक्षणाचे काम पूर्ण केले आहे.