पर्यटकांमधून वाढली स्ट्रॉबेरीला मागणी
पाचगणी : महाबळेश्वर तालुक्याचे मुख्य पीक असलेल्या स्ट्रॉबेरी या फळाला पर्यटकांमधून मागणी वाढू लागली आहे. यंदा परतीच्या पावसाचा या पिकाला मोठ्या प्रमाणात फटका बसला. या नुकसानीतून उभारी घेत शेतकऱ्यांनी पुन्हा स्ट्रॉबेरी रोपांची लागवड केली. सध्या फळाला पोषक वातावरण असून, उत्पादनातही वाढ होऊ लागली आहे. स्ट्रॉबेरीचे दर प्रतिकिलो पाचशे ते सहाशे रुपये असूनही पर्यटकांमधून मागणी वाढू लागली आहे.
चांदणी चौकात वाहतुकीची कोंडी
सातारा : शहरातील तांदूळआळी, चांदणी चौक व खणआळी या परिसरात वाहतुकीची सतत कोंडी होत आहे. अनेक खासगी तसेच मालवाहतूक करणारी वाहने रस्त्याकडेला लावली जात असल्याने वाहतूक कोंडीत अधिकच भर पडत आहे. प्रामुख्याने चांदणी चौकात वाहतुकीची सातत्याने कोंडी होत आहे. याचा पादचाऱ्यांनाही नाहक त्रास सहन करावा लागत आहे. वाहतूक शाखेने अशा वाहनधारकांवर दंडात्मक कारवाई करावी, अशी मागणी नागरिकांमधून होत आहे.