लोकमत न्यूज नेटवर्क
सातारा : कोविडची लस देण्यासाठी जिल्हा प्रशासनाची तयारी पूर्ण झाली असून, शुक्रवारी सातारा, कऱ्हाड आणि पाटण या ठिकाणी लसीसंदर्भात तांत्रिक अडचणींवर मात करण्यासाठी मॉक ड्रिल घेण्यात आले. यावेळी पालकमंत्री बाळासाहेब पाटील, जिल्हाधिकारी शेखर सिंह, जिल्हा आरोग्याधिकारी अनिरुद्ध आठल्ये, जिल्हा शल्यचिकित्सक डॉ. सुभाष चव्हाण, आदी उपस्थित होते.
कऱ्हाड येथील वेणूताई चव्हाण उपजिल्हा रुग्णालयात कऱ्हाडचे पालकमंत्री बाळासाहेब पाटील यांच्या उपस्थितीत कोविड लसीकरणाची तांत्रिक माहिती व डेमो घेण्यात आला. प्रत्यक्षात लस देण्यास सुरुवात झाल्यानंतर कोणतीही अडचण होऊ नये म्हणून जिल्हा प्रशासनाने मॉकड्रिल सादर करून आपण सज्ज असल्याचे दाखवून दिले. यावेळी पालकमंत्री बाळासाहेब पाटील यांनी विचारलेल्या प्रश्नांचे निरसर जिल्हा शल्यचिकित्सक डॉ. सुभाष चव्हाण यांनी केले. जिल्हा परिषदेचे मुख्य कार्यकारी अधिकारी विनय गौडा, उपविभागीय अधिकारी उत्तम दिघे यांच्यासह अधिसेविका व परिचारिका, आदी उपस्थित होते.
साताऱ्यातील जिल्हा शासकीय रुग्णालयात जिल्हाधिकारी शेखर सिंह यांच्या उपस्थितीत कोविड लसीकरणाचे मॉकड्रिल पार पडले. आरोग्य सेवा पुणे मंडळाचे उपसंचालक डॉ. संजय देशमुख, अतिरिक्त जिल्हा शल्यचिकित्सक रामचंद्र जाधव, निवासी वैद्यकीय अधिकारी चंद्रशेखर कारंजकर, जिल्हा परिषदेचे अतिरिक्त जिल्हा आरोग्याधिकारी डॉ. सचिन पाटील, माता बाल संगोपन अधिकारी प्रमोद शिर्के, प्रशिक्षण केंद्र वैद्यकीय अधिकारी के. पी. पाटील, अधिसेविका व परिचारिका, आदी उपस्थित होते. त्याचबरोबर पाटण तालुक्यातील मल्हारपेठ येथेही लसीसंदर्भात तांत्रिक माहिती घेण्यात आली.