कऱ्हाड : येथील लायन्स क्लब ऑफ कऱ्हाडचा यावर्षीचा पदग्रहण सोहळा नुकताच कोरोनाचे नियम पाळून उत्साहात पार पडला. या कार्यक्रमाचे प्रमुख पाहुणे म्हणून दीपक प्रभावळकर उपस्थित होते. यावेळी लायन्स क्लबचे वरिष्ठ पदाधिकारी शिवाजीराव फडतरे, राकेश साळुंखे, जगदीश पुरोहित यांच्यासह अन्य पदाधिकारी व सदस्य मोठ्या संख्येने उपस्थित होते.
कार्यक्रमात प्रारंभी क्लबचे माजी प्रांतपाल विजयकुमार राठी यांनी २०२१-२२चे नूतन अध्यक्ष खंडू इंगळे व त्यांचे संचालक सदस्य यांना शपथ दिली. तसेच उपस्थित अन्य पदाधिकाऱ्यांना त्यांची जबाबदारी सांगून कामाचे स्वरूप सांगण्यात आले. त्यानंतर उपस्थित मान्यवरांनी मनोगत व्यक्त करत नूतन अध्यक्ष खंडू इंगळे व संचालक सदस्यांना शुभेच्छा दिल्या.
यावेळी प्रमुख पाहुणे दीपक प्रभावळकर म्हणाले, लायन्स क्लब ही २१०पेक्षा अधिक देशांत कार्यरत असलेली सर्वात मोठी सामाजिक संघटना आहे. कऱ्हाडच्या क्लबला ५४ वर्षांची परंपरा आहे. यावर्षीच्या अध्यक्षपदी एका पत्रकाराची निवड झाली, याचा मला विशेष आनंद आहे. आगामी काळात सामान्य लोकांसाठी असे काम करा की त्याची दखल लायन्सच्या माध्यमातून इतर देशातसुद्धा घेतली गेली पाहिजे. लायन्सने कऱ्हाडला मोठे काम उभारले असून, कोविड काळातदेखील या क्लबचे काम वाखाणण्याजोगे झाले आहे. यावेळी शहर व परिसरात राबवता येतील, असे अनेक सामाजिक उपक्रम त्यांनी यावेळी सुचवले व क्लबकडून यावर्षी ते पूर्णही होतील, अशी आशा व्यक्त करत त्यासाठी माझ्याकडून भविष्यात लागेल ते सहकार्य मी देईन, अशी ग्वाहीदेखील यावेळी दिली.
क्लबचे शिवाजीराव फडतरे, राकेश साळुंखे यांनीही मनोगत व्यक्त केले. सूत्रसंचालन राजेश शहा, जितेंद्र ओसवाल यांनी केले तर मिलिंद भंडारे यांनी आभार मानले.
फोटो