तरुणाईला शिक्षणापेक्षा ‘क्रेझ’ प्यारी!

खटाव तालुका : महाविद्यालय, बसस्थानकात धूमस्टाईलने एन्ट्री; दिखाव्यासाठी उचापती--महाभारत प्रवासातले...

शेखर जाधव - वडूज--महाविद्यालयीन शिक्षण घेणाऱ्या युवकांमध्ये चंगळवादी संस्कृती रुजत असल्याचे पाहावयास मिळत आहे. शिक्षणाच्या नावाखाली अनेकजण टवाळक्या करत असल्याचे बसस्थानक परिसरात दिसते. कुणी धूमस्टाईलने एन्ट्री करतो, तर कुणी उगीच मुलींच्या समोरून चकरा मारतो. शिक्षणापेक्षा ‘क्रेझ’ प्यारी असणाऱ्या युवकांमध्ये भांडणाचे प्रकारही उद्भवताना दिसत आहेत. दुष्काळी खटाव-माण तालुक्यातून शिक्षणासाठी अनेक युवक-युवमी वडूज शहरात शिक्षणासाठी येत असतात. मात्र योग्य दिशा मिळत नसल्याने कायम निरुत्तर करणारी उत्तरे या भागातील विद्यार्थ्यांचे मोठे नुकसान करीत असल्याचे चित्र दिसून आहे. दहावीनंतर घ्यायचे म्हणून काहीजण शिक्षण घेत असतात. त्यामुळे महाविद्यालय परिसरात नुसत्या चकरा मारणाऱ्याची संख्या मोठी आहे. कॉलेजमधील किरकोळ कारणावरूनही नेहमीच वादाचे प्रसंग घडत असतात. त्यामुळे पालक व पोलीस यंत्रणेची डोकेदुखी वाढत आहे. तर इतर डेपोतील एसटी बसचालक व वाहक पास घेत नसल्याने होणारे वाद-विवाद यांचे प्रसंगी भांडणात रूपांतर होते. शिक्षणापेक्षा क्रेझला जादा महत्त्व देणाऱ्यांच्या संख्येत वाढ होत असल्याचे दिसून येत आहे. मायणी, दहिवडी, खटाव, वडूज व औंध आदी ठिकाणी शिक्षण घेणारे शेतकरी कुटुंबातील अनेक विद्यार्थी असून त्यांना वेळीच मार्गदर्शन मिळाले तर त्यांचे भविष्य घडू शकेल. बसस्थानक परिसरात दादागिरी, मुलींची छेडछाड होत असते. तर अशा किरकोळ कारणांमुळे हुशार मुलेही मागे पडू लागली आहेत. भल्या सकाळी घराबाहेर पडणारी तरुणाई संध्याकाळीच घरी पोहोचते. कॉलेज व क्लासमध्ये आपले जीवन व्यतीत करणारे विद्यार्थी तालुक्याच्या ठिकाणी आपलीही ओळख असावी, असे विद्यार्थ्यांना वाटत असते. सध्याचा काळ फारच भयानक आहे. मात्र, रिस्क घेतली नाहीतर आयुष्यात यशस्वी होऊ शकत नाही, या कटुसत्यालाच ते प्रसंगी फसत आहेत.तालुक्याच्या ठिकाणावरील दादा... दिदी म्हणेल त्याठिकाणी फिरण्यास तर परिस्थिती नसली तरी त्यांच्यासाठी थोडाफार खर्चसुध्दा करण्याची तयारी त्यांची असते. त्यामुळे दिवसेंदिवस फक्त शिक्षणांपेक्षा इतर विषयात त्यांचा जादा वेळ जास्त जातो. बसमध्ये चढताना होणाऱ्या शाब्दिक चकमकीचे रूपांतर प्रसंगी हाणामारीत होण्याचेही प्रकार घडत आहेत. बसमधील जागेवरून वाद परगावहून येणाऱ्या बसमध्ये गर्दी असल्या कारणाने बसण्यासाठी नेहमीच वाद होत असतात. तर खिडकीतून टाकलेले दप्तर इतर ठिकाणी का टाकले, अशा क्षुुल्लक गोष्टीचेही मारहाणीत रूपांतर होत आहे.खुन्नस काढून भांडणेमित्राला बसस्थानकावर सोडण्यासाठी किंवा त्याला भेटण्याचे निमित्त करणारे असंख्य युवक धूमस्टाईलने गाडी चालवित बसस्थानकात एन्ट्री करताना दिसतात. कट का मारला, बघत का गेला अशा किरकोळ कारणावरून खुन्नस काढून भांडणे केली जातात.