करंजे एमआयडीसीचा साक्षात्कार!

पालिकेला जाग : सहा महिन्यांपासून धूळखात पडलेल्या नोटिसांना फुटले पाय

सातारा : पालिकेच्या मालकीची औद्योगिक वसाहत शहरात आहे, हे सांगूनही कुणाच्या लक्षात येणार नाही. जागा उपलब्ध झाली नसल्याने साताऱ्याला मंजूर झालेले १00 खाटांचे महिला रुग्णालय आणि शासकीय वैद्यकीय महाविद्यालय जिल्ह्याबाहेर जाण्याची परिस्थिती निर्माण झाली असताना हाकेच्या अंतरावरील करंजे एमआयडीसीची भली मोठी जागा मोजक्या मंडळींच्या घशात कोंबण्याचा डाव नुकताच उघडकीस आला असून संबंधितांना धाडण्यासाठी सहा महिन्यांपूर्वी तयार केलेल्या नोटीसांना अखेर पाय फुटले आहेत. लघुउद्योजकांना चालना मिळवून देण्यासाठी पालिकेने सुमारे ४0 वर्षांपूर्वी करंजे एमआयडीसीतील पालिकेचे भूखंड काही मोजक्या लोकांना भाडेतत्त्वावर दिले होते. ६0 जणांना मिळालेल्या या भूखंडाबाबत भाडेवाढ किंवा परवाना नूतनीकरण अथवा जागेचा फेरलिलाव अशी कोणतीही कार्यवाही पालिकेने केली नाही. त्यामुळे या भूखंडाच्या माध्यमातून मोजके भाडे पालिकेच्या तिजोरीत जमा होते. ज्या कारणासाठी ही जागा देण्यात आली होती, तो उद्देशच बाजूला पडल्याची वस्तुस्थिती पुढे येत आहे. काहींचे सिरॅमिक उद्योग सुरु आहेत. काहींनी याठिकाणी भंगाराचे व्यवसाय सुरु केले आहेत. वाटप केलेल्या जागेपेक्षा जास्त जागा संबंधितांनी गळबटल्या असून ही औद्योगिक वसाहत मरनासन्नतेकडे नेली आहे. ही औद्योगिक वसाहत म्हणजे केवळ भंगाराची दुकाने असं समीकरणच होऊन बसलं आहे. पालिकेने काही दिवसांपूर्वी या जागेचे सर्व्हेक्षण केले होते. या सर्वेक्षणानुसार संबंधित भूखंडधारकांनी त्यांना देण्यात आलेल्या जागेच्या दुप्पट ते तिप्पट जागेवर अतिक्रमण केले आहे. एक हजार भूखंडाच्या जागी तब्बल तीन हजार चौरस फूटांच्या जागेत हे अतिक्रमण झाल्याचे पालिकेच्या निदर्शनाला आले आहे. त्यानंतर पालिकेला खऱ्या अर्थाने जाग आली. एका नगरसेवकाच्या मागणीनंतर करंजे औद्योगिक वसाहतीची जाणीव पालिका प्रशासनाला झाली. त्यानंतर नोटीसी काढण्याबाबतच्या हालचाली झाल्या. मात्र, नोटीसी प्रत्यक्षात संबंधितांना देण्यासाठी सहा महिन्यांचा कालावधी जावा लागला आहे. (प्रतिनिधी)