रामापूर : ‘पाटण तालुक्यातील दूध उत्पादक शेतकऱ्यांचे आर्थिक जीवनमान उंचावे, यासाठी माजी मंत्री विक्रमसिंह पाटणकर यांनी पाटण तालुका सहकारी दूध संघाची निर्मिती केली. दूध संघाची यशस्वी घोडदौड सुरू असून, सहकारी संस्थेच्या माध्यमातून काय घडू शकते, याचे मूर्तिमंत उदाहरण पाटण तालुका दूध संघाकडे पाहिल्यावर समजते. दूध संघाने राबविलेला प्रशिक्षणाचा शेतकऱ्यांना फायदा होईल,’ असा विश्वास पाटण पंचायत समितीचे सभापती राजाभाऊ शेलार यांनी व्यक्त केला.
पाटण तालुका सहकारी दूध उत्पादक प्रक्रिया संघ, पाटण (सोनगाव) तसेच राष्ट्रीय कृषी बँक व विकास बँका नाबार्ड यांच्या संयुक्त विद्यमाने आयोजित दूध उत्पादक शेतकरी प्रशिक्षण शिबिराच्या उद्घाटनप्रसंगी ते बोलत होते. यावेळी चितळे डेअरीचे डॉ. एच. आर. इंगळे, मार्गदर्शक आर. बी. राजपुते, पाटण अर्बन बँकेचे अध्यक्ष दिनकरराव घाडगे, दूध संघाचे संचालक सुभाष पवार, पंचायत समिती सदस्य बबनराव कांबळे, राष्ट्रवादीच्या महिला अध्यक्षा स्नेहल जाधव, राष्ट्रवादीच्या युवती अध्यक्षा रोहिणी पाटील, पाटणच्या पशुधन विस्तार अधिकारी विद्या झंजाळ, पशुवैद्यकीय अधिकारी संदीप जाधव, सांगलीचे प्रगतशील दूध उत्पादक शेतकरी मकरंद पाटील व अर्चना पाटील यांची उपस्थिती होती.
शेलार म्हणाले, ‘कोरोनामुळे काही अडचणी निर्माण झाल्या. मात्र पंचायत समितीद्वारे शेतकऱ्यांच्या हिताच्या योजनांसाठी जी काही मदत लागेल ती आपण करू. हे प्रशिक्षण केवळ तुमच्यापुरते मर्यादित न ठेवता पुढील शेतकऱ्यांसाठी त्याचा कसा उपयोग होईल, हे पाहावे.’
कार्यक्रमास उपाध्यक्ष शांताराम सूर्यवंशी, संचालक आबासाहेब शिंदे, विकास शिलवंत, आप्पा मोळावडे, अच्युतराव कदम, विठ्ठल जाधव, भागोजी लांबोर, सुंदर पुजारी, रघुनाथ दंडीले, आक्काताई काळे, विठ्ठल पवार उपस्थित होते. सुभाष पवार यांनी प्रास्ताविक केले. संचालक अशोकराव मोरे यांनी स्वागत केले. व्यवस्थापक शिवाजी सूर्यवंशी यांनी आभार मानले.
फोटो ०७रामापूर-दूध संघ
पाटण येथे आयोजित प्रशिक्षण शिबिरात राजाभाऊ शेलार यांनी मार्गदर्शन केले. यावेळी दिनकरराव घाडगे, डॉ. एच. आर. इंगळे, बबनराव कांबळे, विद्या झंजाळ उपस्थित होते. (छाया : प्रवीण जाधव)