सातारा : येथील बॉम्बे रेस्टॉरंट चौकात सेवा रस्त्यावर एका चारचाकीने धडक दिल्यामुळे झालेल्या अपघातात महिला वकील जखमी झाल्या. श्रद्धा गुजर असे जखमी महिला वकिलाचे नाव असून याप्रकरणी श्रीपाद पवार याच्यावर सातारा शहर पोलीस ठाण्यात गुन्हा दाखल झाला आहे. दरम्यान, या अपघातानंतर श्रीपाद पवार हा जखमी श्रद्धा यांना वैद्यकीय उपचारासाठी रुग्णालयात न दाखल करता तेथून पळून गेला आहे. ही घटना शुक्रवार, दि. १६ जुलै रोजी रात्री साडेनऊ वाजता घडली.
याबाबत अधिक माहिती अशी की, श्रद्धा प्रभाकर गुजर (वय २६, रा. अहिरे कॉलनी, देगाव रोड, संभाजीनगर, सातारा) या त्यांची दुचाकी (एमएच ११ बीआर ३०२५) घेऊन बॉम्बे रेस्टॉरंट चौकातील बालाजी हॉटेलसमोर थांबल्या होत्या. याचवेळी अजंठा चौक ते बॉम्बे रेस्टॉरंट चौक सेवा रस्त्याने श्रीपाद सुरेश पवार (वय ३४, रा. सुरूर, ता. वाई, जि. सातारा) हे त्यांच्या ताब्यात असलेली कार (एमएच १२ एनबी २६३२) हयगय आणि अविचाराने तसेच रस्त्याच्या परिस्थितीकडे दुर्लक्ष करून चालवत होते. यावेळी श्रीपाद याने श्रद्धा यांच्या दुचाकीला पाठीमागून जोराची धडक दिली. यात श्रद्धा यांच्या उजव्या पायाला आणि डाव्या पायाच्या नडगीला जखम झाली. दरम्यान, या अपघातानंतर श्रीपाद पवार हा जखमी श्रद्धा यांना वैद्यकीय उपचारासाठी रुग्णालयात न दाखल करता तेथून पळून गेला. ही घटना दि. १६ जुलै रोजी रात्री साडेनऊ वाजण्याच्या सुमारास घडली. याप्रकरणी श्रद्धा यांनी दि. १७ रोजी रात्री सव्वाआठ वाजण्याच्या सुमारास सातारा शहर पोलीस ठाण्यात तक्रार दिल्यानंतर श्रीपाद याच्यावर गुन्हा दाखल करण्यात आला आहे. अधिक तपास पोलीस हवालदार कारळे करत आहेत.