कऱ्हाड : येथील पालिकेच्यावतीने राजेश शंकर कांबळे व विश्वास तानाजी बाबर यांना दीनदयाळ अंत्योदय योजना तसेच राष्ट्रीय नागरी उपजीविका अभियानअंतर्गत विदर्भ कोकण ग्रामीण बँकेच्या सहकार्याने स्वयंरोजगारासाठी रिक्षाचे वितरण करण्यात आले. यावेळी नगराध्यक्षा रोहिणी शिंदे, आरोग्य सभापती विजय वाटेगावकर, मुख्याधिकारी रमाकांत डाके, विदर्भ कोकण बँकेचे शाखाधिकारी मोहसीन शिरगुप्पे, सेल्स मॅनेजर माने उपस्थित होते.
या अभियानाचे व्यवस्थापक गीतांजली यादव, गणेश जाधव, समूह संघटक अंजना कुंभार, पालिकेच्या महिला बालकल्याण विभागाच्या विभागप्रमुख दीपाली रेपाळ, समुपदेशक प्रमोद जगदाळे उपस्थित होते.
अस्ताव्यस्त पार्किंगमुळे वाहतुकीची कोंडी
मलकापूर : येथील राष्ट्रीय महामार्गालगत असणाऱ्या उपमार्गावर वाहनधारकांकडून अस्ताव्यस्तपणे वाहने पार्क केली जात आहेत. त्यामुळे या परिसरात वाहतूक कोंडी निर्माण होऊन वादावादीचे प्रसंग उद्भवत आहेत. ढेबेवाडी फाट्यापासून कोल्हापूर नाक्याकडे येणाऱ्या सर्व्हिस रस्त्यावर दुतर्फा चारचाकी व दुचाकी वाहनांचे अस्ताव्यस्तपणे पार्किंग केले जात आहे. त्यामुळे नियमांचे उल्लंघन करणाऱ्या वाहनधारकांवर पोलिसांनी योग्य ती कारवाई करावी, अशी मागणी नागरिकांतून केली जात आहे.
शामगाव घाटातील सुरक्षा कठडे ढासळले
शामगाव : येथील घाट अनेक समस्यांच्या गर्तेत सापडला आहे. या घाटातील संरक्षक कठड्यांची दुरवस्था झाली आहे. त्यामुळे वैद्यकीय उपचार घेण्यासाठी जाणाऱ्या प्रवाशांच्या सुरक्षिततेचा प्रश्न ऐरणीवर आला आहे.
शामगाव घाट एकेकाळी लूट, मारामारीसाठी बहुचर्चित होता. कालांतराने हे प्रमाण कमी झाले. मात्र, सध्या या घाटातील संरक्षक कठड्यांच्या वारंवार होणाऱ्या पडझडीमुळे प्रवाशांच्या सुरक्षिततेचा प्रश्न ऐरणीवर आला आहे. या घाटातील संरक्षक कठडे तुटल्यामुळे काही सामाजिक संघटनांनी यावर आवाज उठवला होता. त्यानंतर पडझड झालेल्या कठड्यांची दुरुस्ती करण्यात आली. मात्र, मध्यंतरी वारंवार वाहनांच्या धडकेत कठड्यांची मोडतोड झाली आहे.
ढेबेवाडी मार्गावर धोकादायक वळण
कुसूर : मलकापूर येथील ढेबेवाडी फाट्यापासून ते ढेबेवाडीपर्यंतच्या मार्गावर अनेक ठिकाणी धोकादायक वळण आहे. या वळणांपैकी शिंंदेवाडी येथील वळण जास्त धोकादायक असल्याने या ठिकाणी रात्रीच्यावेळी अपघात होत आहेत. या वळणावर भरधाव वाहनांवरील चालकांचा ताबा सुटून वाहने नजीकच्या ओढ्यात जात आहेत. या ठिकाणी दिशादर्शक व सूचना फलक नाहीत. फलक लावण्यात आले नसल्याने रात्रीच्या वेळी दुचाकी वाहनांमध्ये अपघात होत आहे.
ढेबेवाडी फाटा चौकात वाहतुकीचा बोजवारा
मलकापूर : ढेबेवाडी फाटा येथे वाहनचालक अस्ताव्यस्तपणे रस्त्याच्या दुतर्फा वाहने लावतात. त्यामुळे वाहतुकीस अडथळा होत असून, वाहतुकीचा बोजवारा उडत आहे. ढेबेवाडी फाटा हे परिसरातील मध्यवर्ती केंद्र आहे. याठिकाणी विद्यार्थ्यांसह प्रवाशांची मोठ्या प्रमाणावर गर्दी असते. तसेच वडाप वाहनेही याचठिकाणी थांबतात. त्यामुळे कोंडीत भर पडते. पोलिसांनी संबंधितांवर कारवाई करावी, अशी मागणी नागरिकांतून होत आहे.