चाफळ : कऱ्हाड - पाटण तालुक्याला वरदान ठरलेले चाफळ विभागातील गमेवाडी येथील उत्तरमांड धरण व वाघजाईवाडी येथील डेरवण पाझर तलाव पूर्ण क्षमतेने भरुन सांडव्याव्दारे पाण्याचा विसर्ग सुरु झाला आहे. त्यामुळे शेतकऱ्यांमधून समाधान व्यक्त करण्यात येत आहे. गेल्या पंधरा दिवसांपासून धरण पाणलोट क्षेत्रात पडत असलेल्या पावसाने पाणी पातळीत कमालीची वाढ होऊन गुरुवारी पहाटे ५ वाजता धरणाच्या सांडव्यावरुन २,५९० घ. फु. प्र. से. पाणी वाहू लागले आहे. नदीकाठावरील गावांमधील ग्रामस्थांना प्रशासनाने सावधानतेचा इशारा दिला आहे.
गमेवाडी येथे उत्तरमांड धरण उभारण्यात आले आहे. तत्कालीन शिवसेना - भाजप युती शासनाच्या काळात सन १९९७मध्ये या प्रकल्पाच्या कामाला प्रत्यक्षात प्रारंभ झाला होता. गमेवाडी - नाणेगाव बुद्रुक गावच्या सरहद्दीवर उत्तरमांड नदीवर हा प्रकल्प साकारला आहे. संपूर्ण चाफळ विभागासह कऱ्हाड तालुक्यातील खालकरवाडी, चरेगाव, भवानवाडी, उंब्रज परिसरातील वाड्या - वस्त्यांना वरदान ठरलेल्या गमेवाडीनजीकच्या उत्तरमांड मध्यम प्रकल्पात ६९३.७० टीएमसी पाणीसाठा झाला असून, सांडव्यावरुन २,५९० घ. फु. प्र. से. पाणी वाहू लागले आहे.
दरम्यान, जलाशयातील पाणीसाठा पाहण्यासाठी पर्यटक गर्दी करत आहेत. सन १९९७मध्ये सुरु झालेल्या उत्तरमांड प्रकल्पाचे काम सध्या पूर्णत्वास गेले आहे. एक हजार ४२० मीटर लांब व ४४.४५ मीटर उंच असलेल्या या जलाशयात ६८३ मीटर जलसंचय पातळी आहे.
या प्रकल्पात तब्बल ६२५ एकर जमीन बाधित झाल्याने नाणेगाव, माथणेवाडी येथील ग्रामस्थांना विस्थापित व्हावे लागले आहे. धरण व्यवस्थापनाच्या अधिकाऱ्यांनी धरणाच्या पिचींगसह सांडव्यातील पंधरा मीटर उंचीच्या भिंतीचे काम पूर्ण केले आहे. पुराचे पाणी सोडण्यासाठी दगडी बांधकामाच्या सांडव्यावर १२×४ मीटर आकाराचे तीन वक्र दरवाजे बसवले आहेत. परंतु, माथणेवाडीकरांचे पुनर्वसन रखडल्याने धरणात एक टीएमसीही पाणीसाठा करण्यास प्रकल्पग्रस्तांचा विरोध आहे. धरणात १ टीएमसी पाणीसाठा करण्यात येणार आहे. मात्र, तो नक्की कधी व कोणत्या साली होईल, हे सांगता येणार नाही. या प्रकल्पाचे काम पूर्ण झाले असले तरी आजही विस्थापितांचे प्रश्न प्रलंबित आहेत.
चौकट :
डेरवण तलावही पूर्ण क्षमतेने भरला
वाघजाईवाडीजवळ असणारा डेरवण पाझर तलाव गत महिन्यात पहिल्याच पावसात पूर्ण क्षमतेने भरला आहे. याही तलावाच्या सांडव्यावरुन पाण्याचा विसर्ग होत आहे. गतवर्षी जुलै महिन्याच्या पहिल्याच आठवड्यात तलाव ओव्हर फ्लो झाला होता. यावर्षी मात्र तो जूनच्या शेवटी एक महिना अगोदरच भरुन वाहू लागल्याने ग्रामस्थांनी समाधान व्यक्त केले आहे.