पिंपोडे बुद्रुक : सातारा, लोणंद, पुणे या राज्यमार्गावर वाठारस्टेशनजवळ आदर्की फाट्यावर असणाऱ्या पोलीस मदत केंद्रांची दुरवस्था झाली होती. मात्र, वाठारस्टेशनचे नव्याने पदभार स्विकारलेले सहायक पोलीस निरीक्षक संदिप भोसले यांनी तातडीने कार्यवाही करून केंद्र इमारतीची डागडुजी करून त्या ठिकाणी कर्मचाऱ्यांची नेमणूक केली आहे. त्यामुळे वाहनधारकांबरोबरच व्यवसायिकांमधून समाधान व्यक्त होत आहे.याबाबतचे वृत्त असे की, वाठारस्टेशन पासून साधारण अडीच किलोमीटर अंतरावर आदर्की फाटा असून त्या ठिकाणी तत्कालिन जिल्हा पोलीस प्रमुख मीरा बोरवणकर यांच्या हस्ते २३ फेब्रुवारी १९९९ साली पोलीस मदत केंद्र सुरू करण्यात आले होते. मात्र, गेल्या काही वर्षाचा अपवाद वगळता हे मदत केंद्र नेहमी बंद अवस्थेतच असायचे.सातारा, लोणंद, पुणे हा राज्यमार्ग असल्यामुळे या मार्गावरुन मोठ्या प्रमाणात वाहतुक होत असते. राष्ट्रीय महामार्गावरील टोल चुकविण्यासाठी या मार्गाचा परराज्यातील वाहतूक करणारी वाहने वापर करतात. वाठार स्टेशन पासून पुढे गेल्यावर सालपे घाट लागतो. या घाटात दुचाकी स्वार आणि वाहतुक विरळ असताना एखाद्या चार चाकी वाहणांस अडवून लुटन्याच्या घटना अनेकदा घडल्या आहेत.या अडचणीपाहून ‘लोकमत’मध्ये ‘पोलिस मदत केंद्र पोलिसांच्या प्रतिक्षेत’ या मथळ्याखाली बातमी प्रसिद्ध करण्यात आली होती. या वृत्ताची दखल घेऊन सहायक पोलीस निरीक्षक संदिप भोसले यांनी तातडीने केंद्र इमारतीची डागडुजी करून त्या ठिकाणी कर्मचाऱ्यांची नेमणूक केली आहे. (वार्ताहर)
पोलीस मदत केंद्राचे भाग्य उजळले
By admin | Updated: December 5, 2014 23:17 IST