एटीएम अपहारप्रकरणी आणखी ११ अटकेत

७२ लाखांचा घोटाळा : नऊ दिवसांची पोलीस कोठडी

कोरेगाव : कोरेगाव आणि खटाव तालुक्यांतील पाच एटीएम सेंटरमधील मशीनमध्ये पैशांचा भरणा न करता सुमारे ७१ लाख ७५ हजार ७०० रुपयांचा अपहार केल्याप्रकरणी ११ जणांना कोरेगाव पोलिसांनी मंगळवारी रात्री अटक केली आहे. त्यांना नऊ दिवस पोलीस कोठडीत ठेवण्याचा आदेश न्यायालयाने दिला आहे. दरम्यान, या गुन्ह्यात यापूर्वी चौघांना अटक करण्यात आलेली असून, ते देखील पोलीस कोठडीत आहेत.बँक आॅफ महाराष्ट्रच्या रहिमतपूर, चिमणगाव, पेठ किन्हई येथील प्रत्येकी एका शाखेत आणि पुसेगाव येथील दोन शाखेतील एटीएम केंद्रांवर पैसे न भरता एकूण ७१ लाख ७५ हजार ७०० रुपयांचा अपहार झाल्याचे निदर्शनास आल्यानंतर कंपनीचे व्यवस्थापक (ग्राहक सेवा वितरण) अशोक प्रभू (रा. डोंबिवली-कल्याण) यांनी कोरेगाव पोलीस ठाण्यात फिर्याद दाखल केली होती. त्यानुसार सायंटिफिक सिक्युरिटी मॅनेजमेंट सर्व्हिसेस प्रायव्हेट लिमिटेड, लि. मुंबईचा सातारा येथील शाखाधिकारी अजय दिलीप हगवणे (रा. पांडेवाडी, पो. भोगाव, ता. वाई) याच्यासह नऊ कर्मचारी आणि त्यांचे सहा साथीदारांवर गुन्हा नोंद करण्यात आला होता. सहायक पोलीस निरीक्षक दत्ताराम बागवे, हवालदार बी. आर. यादव, पोलीस नाईक सनी आवटे यांनी कंपनीचा सातारा शाखेचा व्यवस्थापक अजय हगवणे, वैभव साळुंखे (रा. बोरगाव), अमित यादव (रा. अतीत), अतुल साळुंखे (रा. बोरगाव), शेखर गायकवाड (रा. पांडेवाडी), शशांक यादव (रा. करंजे-सातारा), नामदेव नवघण (रा. वासोळे), निखिल नावडकर (रा. सोनगाव), सागर खरात (रा. आसरे), जितेंद्र शेडगे (रा. बोरगाव), अभिजित बोरस्कर (रा. वडगाव) यांना मंगळवारी रात्री अटक करण्यात आली आहे. बुधवारी त्यांना न्यायालयात हजर केले असता, न्यायाधीश सुषमा हिंगसे यांनी नऊ दिवस पोलीस कोठडीत ठेवण्याचा आदेश दिले. दरम्यान, याच गुन्ह्यात बुधवार, दि. १२ रोजी तुषार साळुंख (रा. बोरगाव), सचिन जाधव (रा. काशीळ), कुमार ऊर्फ बबलू सकट (रा. बोरगाव हल्ली नागठाणे) आणि विराज ऊर्फ अमोल कुंदप यांना अटक करण्यात आली होती. सहायक पोलीस निरीक्षक दत्ताराम बागवे तपास करत आहेत. (प्रतिनिधी)