वाई : वाई तालुक्यातील भोगाव हद्दीतून टेम्पो (एमएच ११ एएल ५९८८) या गाडीतून सागवानी लाकडाची विनापरवाना वाहतूक करताना स्वप्नील प्रकाश बांदल (वय २५, रा. पाचवड) याला वन विभागाने गाडीसह ताब्यात घेतले. त्याच्यावर गुन्हा दाखल करण्यात आला आहे. तो गाडीतून विनापरवानगी सागाच्या लाकडाची वाहतूक करताना आढळून आले आहे. या कारवाईत साडेतीन लाखाचा मुद्देमाल जप्त करण्यात आला आहे.
दरम्यान, प्रकाश बांदल हा बुधवार, दि. २४ रोजी वाईतील मोतिबाग परिसरातून कालव्यावरून टेम्पो (एमएच १२ एफसी ७३६१) या वाहनामधून विनापरवाना साग जातीच्या झाडांच्या लाकडाची वाहतूक करीत असताना, त्याच्यावर कारवाई केली. मालाची अंदाजे किंमत पाच लाख ५४ हजार असून मालासह गाडी ताब्यात घेतली. दोन्ही दिवशी केलेल्या कारवाईत ८ लाख ६९ हजार रुपयांचा माल जप्त करण्यात आला आहे.
वाई वन विभागाने धडक कारवाई केल्याने वाई तालुक्यातील बेसुमार वृक्षतोडीला लगाम बसणार आहे. वन विभागाने जागेवरच पंचनामा करून गाडी मालासह आरोपीला ताब्यात घेतले, अशी माहिती वन विभागाचे वनक्षेत्रपाल महेश झांजुर्णे यांनी दिलेल्या प्रसिद्धी पत्रकात म्हटले आहे.
ही कारवाई उपसंरक्षक भारतसिंह हाडा, सहायक वनरक्षक व्ही. बी. भडाळे, वाई वनक्षेत्रपाल महेश झांजुर्णे यांच्या मार्गदर्शनाखाली भुईंज परिमंडलाचे वनपाल सुरेश पटकारे, संग्राम मोरे, वनरक्षक वैभव शिंदे, सुरेश सूर्यवंशी, संदीप पवार, प्रदीप जोशी, संजय आडे, अजित पाटील यांच्या पथकाने कारवाईत सहभाग घेतला.