महाबळेश्वर : महाबळेश्वरपासून तीन किमी अंतरावर महाबळेश्वर-मेढा मुख्य रस्त्यावर हॉटेल ल मेरिडियनच्या आऊटगेटजवळ रस्त्यावर उभ्या असलेल्या पिकअप या वाहनास मागील बाजूस जोरदार धडक बसल्याने दुचाकीस्वार महेश रघुनाथ केळगने (वय २२, रा. भेकवली, महाबळेश्वर) हा युवक जागीच ठार झाला. पोलिसांनी याप्रकरणी रस्त्यावर धोकादायकरीत्या पिकअप गाडी उभी करणाऱ्या वाहनचालकांवर गुन्हा दाखल केला आहे.
याबाबत माहिती अशी की, महाबळेश्वर-मेढा मुख्य रस्त्यावर हॉटेल ल मेरिडियनच्या आऊटगेटला पार्सल घेऊन आलेली महिंद्रा पिकअप ही गाडी (एमएच ११ सीएच ५११२) गुरुवारी दुपारी पावणेचारच्या दरम्यान रस्त्यावर उभी होती. महाबळेश्वरहून महेश रघुनाथ केळगने हा घरी भेकवलीला दुचाकी (एमएच ११ सीआर ९०१०) ने जात असताना गाडी ओव्हरटेक करताना रस्त्यावर उभ्या असलेल्या पिकअप या वाहनास दुचाकीची मागील बाजूस जोरदार धडक बसली. युवकाच्या डोक्याला व पोटाच्या खालील बाजूस जोरदार मार लागल्याने हा युवक गंभीर जखमी झाला. त्यानंतर जमलेल्या लोकांनी या युवकास येथील ग्रामीण रुग्णालयात उपचारासाठी नेले असता डॉक्टरांनी उपचाराआधीच मृत झाल्याचे घोषित केले.