फलटण : लोणंद येथील सोना अलाईज कंपनीच्या माध्यमातून २१ टन ऑक्सिजनची निर्मिती करण्याच्या सूचना केल्या आहेत. लवकरात लवकर याचे उत्पादन सुरू होऊन तीन जिल्ह्यातील गरजूंना याचा उपयोग होणार आहे. कोरोना काळात जनतेला दिलासा देण्यासाठी जनतेच्या मागे ठामपणे उभे असल्याची ग्वाही विधानपरिषदेचे सभापती रामराजे नाईक-निंबाळकर यांंनी दिली.
फलटण नगरपालिकेचे उपनगराध्यक्ष नंदकुमार भोईटे यांनी कोरोनाबाधितांना मोफत सेवा देण्याच्या उद्देशाने स्वखचार्तून उभे केलेल्या सजाई गार्डन कोविड केअर सेंटरचे लोकार्पण रामराजे नाईक-निंबाळकर यांच्या हस्ते करण्यात आले. त्यानंतर झालेल्या पत्रकार परिषदेत ते बोलत होते.
रामराजे म्हणाले, जिल्ह्यातील सर्व आमदार व खासदार यांनी एकत्रितपणे काम केले तर जिल्ह्यातील नागरिकांना काहीही कमी पडणार नाही. नागरिकांनी मास्क वापरणे सोडल्यामुळे ही परिस्थिती उद्भवली आहे. नागरिकांनी नियम पाळले तर कोरोनाचे संकट दूर होऊ शकते. त्यामुळे नागरिकांनी सहकार्य करावे, असे आवाहन रामराजे नाईक-निंबाळकर यांनी केले. फलटण शहरातील वाढत्या कोरोनाबाधितांच्या संख्येमुळे सर्वत्र घबराट निर्माण झाली आहे. शहरातील सर्व हॉस्पिटल्समध्ये असणारे बेड्स हे कोरोनाबाधितांसाठी पुरेनासे झाले आहेत. या पार्श्वभूमीवर शहरातील व तालुक्यातील कोरोनाबाधितांसाठी उपनगराध्यक्ष नंदकुमार भोईटे यांनी १०० बेडचे सुसज्ज कोविड सेंटर सुरु केल्याचे समाधान आहे. या सेंटरमध्ये २८ ऑक्सिजन बेड तर ७२ सर्वसाधारण बेड कोरोनाबाधितांसाठी तयार करण्यात आले आहेत. नंदकुमार भोईटे यांचे कार्य वाखणण्याजोगे आहे, असे गौरवोद्गारही त्यांनी काढले.
यावेळी आमदार दीपक चव्हाण, जिल्हा परिषदेचे माजी अध्यक्ष संजीवराजे नाईक-निंबाळकर, प्रांताधिकारी डॉ. शिवाजी जगताप, उपनगराध्यक्ष नंदकुमार भोईटे, तहसीलदार समीर यादव, मुख्याधिकारी प्रसाद काटकर, गटविकास अधिकारी डॉ. अमिता गावडे, नगरसेवक पांडुरंग गुंजवटे, बिल्डर्स असोसिएशन ऑफ इंडिया महाराष्ट्र राज्याचे चेअरमन रणधीर भोईटे, नगरसेवक अजय माळवे, किशोरसिंह नाईक-निंबाळकर, सनी अहिवळे, राहुल निंबाळकर, अमित भोईटे, ऋतुराज भोईटे व किरण भोईटे यांच्यासह मान्यवर उपस्थित होते.
(चौकट)
उपजिल्हा रुग्णालयाबाबत नाराजी...
उपजिल्हा रुग्णालयातील भोंगळ कारभाराविषयीच्या काही गोष्टी उपस्थित पत्रकारांनी रामराजेंच्या निदर्शनाला आणून दिल्या. त्याबाबत रामराजेंनी नाराजी व्यक्त करून प्रांताधिकारी यांना तातडीने वारिष्ठांकडे याबाबतचा अहवाल पाठविण्याचे आदेश दिले.
फोटो : २१ फलटण
फलटण येथे उपनगराध्यक्ष नंदकुमार भोईटे यांनी सुरू केलेल्या कोरोना सेंटरचे उद्घाटन रामराजे नाईक-निंबाळकर, आमदार दीपक चव्हाण, संजीवराजे नाईक-निंबाळकर आदींच्या उपस्थितीत करण्यात आले. (छाया : नसीर शिकलगार)