सुरेंद्र शिराळकर
आष्टा : येथील भाजी मंडई नजीक असलेल्या हॉटेल सनशाईन परमिट रूम व बिअर बार मध्ये एका तरुणावर हल्ला झाला. या तरुणाचे नाव वैभव बाळू घस्ते (वय १९) असून तो राहणार आष्टा साठे नगर येथील आहे. त्याच्यावर अंकित राठोड राहणार आष्टा गांधीनगर याने छातीवर वार करून धारदार शस्त्राने खून केला. ही घटना सोमवारी रात्री नऊच्या दरम्यान घडली. खुनाची घटना सीसीटीव्हीमध्ये कैद झाली आहे. या घटनेने आष्टा शहरात खळबळ उडाली आहे.
घटनास्थळावरन मिळालेल्या माहितीनुसार, आष्टा येथील वैभव बाळू घस्ते हा युवक भाजी मंडई नजीक असलेल्या भर वस्तीतील हॉटेल सनशाईन बियर बार व परमिट रूम मध्ये गेल्यानंतर अचानक अंकित राठोड हा त्याच्याजवळ आला, व त्याने हातातील शस्त्राने त्याच्या छातीवर वार केला. यानंतर तो पळून गेला. वैभव घस्ते याला साजन अवघडे यांनी ॲम्बुलन्स मधून तातडीने आष्टा येथील एका खाजगी रुग्णालयात व त्यानंतर ग्रामीण रुग्णालयात दाखल केले.
मात्र, उपचारापूर्वी वैभव घस्ते याचा मृत्यू झाल्याचे डॉक्टर सचिन गायकवाड यांनी सांगितले. अद्याप खुनाचे नेमके कारण समजू शकले नाही. आरोपी अंकित राठोड हा खून केल्यानंतर फरार झाला. आष्टा ग्रामीण रुग्णालय व हॉटेल सनशाइन परमिट रूम व बियर बार या ठिकाणी बघ्यांनी गर्दी केली होती. आष्टा पोलीस ठाण्याचे पोलीस निरीक्षक श्रीकृष्ण कटकधोंड, सहाय्यक पोलीस निरीक्षक महेश गायकवाड, हवालदार प्रवीण ठेपने याच्यासह आष्टा पोलिस अधिक तपास करीत आहेत.