अलकूडजवळ ट्रकची मोटारीस धडक; एक ठार

अलकूडजवळ ट्रकची मोटारीस धडक; एक ठार

लोकमत न्यूज नेटवर्ककवठेमहांकाळ : चिंचणी (ता. अथणी) येथून देवदर्शनाहून परतत असताना, मिरज-पंढरपूर राज्यमार्गावर अलकूड (एम) नजीक ट्रक आणि मोटारीच्या भीषण अपघातात एकजण जागीच ठार, तर दहा जण गंभीर जखमी झाले. दिगंबर महादेव वाघमोडे (वय ४३, रा. कुर्डुवाडी, ता. माढा) असे मृत व्यक्तीचे नाव आहे. अपघातात मोटारीचा चक्काचूर झाला आहे. हा अपघात शुक्रवारी सायंकाळी ४ वाजता घडला. माढा तालुक्यातील कुर्डुवाडी येथील रेल्वे कॉलनीतील वाघमोडे कुटुंबिय नवदाम्पत्यासह कर्नाटकातील चिंचणी येथे मायाक्का देवीच्या दर्शनासाठी गेले होते. गुरुवारी रात्री साडेअकरा वाजता मोटारीतून सर्वजण चिंचणीसाठी रवाना झाले. पहाटे देवदर्शन घेऊन दुपारी ते मिरजमार्गे कुर्डुवाडीला परतत होते.दुपारी चार वाजता त्यांची मोटार (क्र. एमएच ४५ - ५८६०) मिरज-पंढरपूर रस्त्यावर अलकुड एम गावाजवळ असणाऱ्या उत्तम प्रेस्टीज या कारखान्याजवळ आली असता शिरढोणहून मिरजेच्या दिशेने येणाऱ्या ट्रकने (क्र. एमएच १० ए ९३८०) समोरच्या वाहनाच्या पुढे जाण्याच्या प्रयत्नात वाघमोडे यांच्या मोटारीला समोरून जोरदार धडक दिली. अपघातात दिगंबर वाघमोडे हे जागीच ठार झाले, तर अन्य दहाजण गंभीर जखमी झाले. ट्रक चालकाने पाईप कारखान्याकडे अचानक ट्रक वळविल्याने हा अपघात झाल्याचे प्रत्यक्षदर्शींनी सांगितले. अपघातानंतर ट्रक चालक पसार झाला. घटनास्थळी मोठी गर्दी जमली होती.अपघातात नवदाम्पत्य मुक्ता यशवंत वाघमोडे (वय २१) व यशवंत बजरंग वाघमोडे (वय २५) यांच्यासह सुनीता बजरंग वाघमोडे (वय ४५), महेश विष्णू देवकाते (वय २८), संतोष नवनाथ नरुटे (वय ३०), चंदना दिगंबर वाघमोडे (वय ११), अर्जुन दिगंबर वाघमोडे(वय १३), राही जानकर, हिरकणा प्रकाश एडके (वय ५५, सर्वजण रा. रेल्वे कॉलनी कुर्डुवाडी, ता. माढा) हे गंभीर जखमी झाले. जखमींना तात्काळ खासगी वाहनातून मिरज शासकीय रूग्णालयात दाखल करण्यात आले. अपघाताची नोंद कवठेमहांकाळ पोलिसात झाली आहे.